بایقوش
یئنی ادبیات آنلاییشینا دوغرو
گلمه دی رضا براهنی
چئویرن: لاله جوانشیرگونش گلسین دئیه چیرپیندیم.
گلمه دی
ساریشین ساچلارینی مرمر کمرینین سئحرینه تؤکموش
بیر دلینین آردینجا گئتدیم
گونش گلسین دئیه
گلمه دی.
کاغیذ دووار، داش، تورپاق اوستونه یازدیم
اوخونسون دئیه یازی
گونش گلسین دئیه
گلمه دی.
قورد کیمی اولادیم
قورد بورنو کیمی سوخولدوم زمانه نین قارنینا
یاتدیم
گئجه – گوندوزیاتدیم
گونش گلسین دئیه.
گلمه دی!
نئجه ده غریبه، اوغورسوز بیر چاغ
دوران کؤپک ییه سی من ایسه کؤپک
قاپیدان قوولونجا
وفا دامیندان
داملادیم ایچری
گونش گلسین دئیه
گلمه دی
یاناقلاریما عشق ائتدیم ظلمتده شاملاری
جادده یه ائندییمده
ایکی یاناغیمی
خالقیم اوچون کور چلیک کیمی توتدوم
گونش گلسین دئیه
گلمه دی.
هیچقیریقلاریم یوخودان
آجی یوخودان
یئر اوزو اوشاقلارینین یورغون، دادلی یوخولارینی قاچیردیسادا
آغلاماغا ارکیم یئتمه دی
نه دوست یانیندا
نه حضوروندا
نه ده اؤز خلوتیمده
ارکیم آغلاماغا یئتمه دی
گونش گلسین دئیه
گلمه دی.
1 Comments:
بلکه ائله گوناهین هامیسی مندن ایدی
هر نه یه سسبب کار من اولدوم
من ائله بیلیردیم گونش بویلاناجاق
بویاسیز اوتاغیما
سن دئمه گونشی بیر آوارا قارانلیق هک ائله میش
سن دئمه گونش ده یالوارارمیش قارانلیغا
بلکه ده گوناهین هامیسی مندن ایدی
بلکه ده واختیمیز چاتمایاجاق دانلاماغا
ایندی ائله داغیلمیشام کی
هئچ تانری دا بیر یئره توپلایا بیلمز منی
ایندی تانرییا یالواریرام
منی سیلسین بو دونیانین چیرکین سطیرلریندن
منی سیلسین بو دونیانین کیتابیندان
داها پاراقراف - پاراقراف یاشاماغیمی ایسته میرم
بلکه ده ائله گوناهین هامیسی مندن ایدی
بلکه ده
آراز گؤیشلی