بوردان دینله یین*

گل گلیرم، گل گلیرم، گل گلیرم، گل گلیرم، گل گلیرم، گل گلیرم
بویون دا بویون اولا بیلمز...... بویون ده ییر بویون
هایانی توتوسان او یانی قاچیر.
اویاندیریب هر طرفه چیرپیسان..... او طرفی چیپسانیر.
کؤهنه سَخسی تاغار کیمی چارتلانیب باغری
بؤیرونن آخیر زامان.
آغ یوغورت کیمی آخیر گؤز،
...........................آخیر ال،
...................................چیین لر آخیر.
دوغوم گونووو یازیردیم
گؤردوم بو قیش سیز چولاق ایل... بوتون قیش کئشدی
نه لر کئشدی،
کیم کیمنن، کیمه کیمنن
بو هاندا گؤردوم، قهوه قوتولوب، رومان دا
آزیپ یولون سئیدری گئدیر
هوره-هوره ایت کیمی قاچیر زامان.
سینیخ دام کیمی باشیما گلیر هاوا
سویوخدو آمان! .
گل گلیرم، گل گلیرم، گل گلیرم، گل گلیرم، گل گلیرم، گل گلیرم

.
آخی اولماز کی
اولماز کی بویومو کَسم،
...........................بوینومو قیسام،
..............................................قول قیچیمی قیسدیرام
اولمازدی دریمی قاتیخ،
..............................اوزومو چوپور
..................................قاشلاریمی قالین قئییم بوروخدورام
شئر قورقودلاری ببکلندیرن،
یولدان ائلیین آهولاری گیله لریمدن قوغام
اولمازدی انگیمی چکیب
میرواری دیشلریمین یئرینه آت دیشی قویام.
نازیک بئلیمی ائنله دیب
آلما یانلاریما دا بیر گؤت باغلییب
دوغوم گونونده "نابات رینگی" یئرینه "بابا کرم" بورجودام.
اولمازدی، هئچ اولمازدی
یازدیغیم شعرلرین اوستونن
اسگیک شاعیرلر کیمی اوتوروب چیرک نویس یازام
شمسانه لرین یئرینه
اوتوروب سنه راعتمادی گلم.
قیزیل لاریم میسه دؤنمور جانیم
بو شوشه لری آز چک جانیمین ایتی الماسیما
....................چاتداللار،
..................................پاتداللار،
..................................ایتیلیب قیراخلارین قاتداللار.
هایانی توتوسان او یانی قاچیر
اویاندیریب هر طرفه چیرپیسان، او طرفی چیپسانیر.
دوغوم گونووو یازیردیم،
گؤردوم بویون دا بویون اولابیلمز
بویون ده ییر بویون
بوهاندا،
قهوه قوتولدو، رومان دا
گل گلیرم، گل گلیرم، گل گلیرم، گل گلیرم، گل گلیرم، گل گلیرم
.