آيگون آسلانلی اوچون
گونئل مولود

سنه باشقالاری توخوناندا
قيسقانميرام...
سنه باشقالاری توخوناندا
غضبلنميرم...
سن منيم بير پارچامسان
آغريييرام
سنه باشقالاری توخوناندا .

سن آنام کيمی دئييل سن
اونو بو قدر سئومزديم
سن باجيم اولا بيلمزدين
بئله دويمازدی منی
سن کيشيلر کيمی دئييل سن
بئله آرخايين اويومازديم
اونلارين قوجاغيندا...

هر سحر
يولومون اوستونه
اييرنج صيفتلی کيشيلر چيخير
هر آخشام ائوه دؤننده
صاباح کسيله جک بير حئيوان گؤرورم
سن هر گئجه بدنينده کی
ايکی گونلوک تر قوخوسويلا
مني گؤزلَسَيدين
بونلاری اؤزومه درد ائله مزديم

اونلار بيزی حئيوان کيمی خاطيرلايير
قوخوموزو
بيزسه بير - بيريميزين
دريسی نين يادداشيندا قاليريق
من
هر آن دويورام
سنين
نئجه يومشاق اولدوغونو

مؤحکم اولدوقلاريندان دئييل
دويغوسوز اولدوقلاريندان
کيشيلر آنلاماز
قادينلارين گؤز ياشلارينی
کيمينسه چيينينه آخيتماق ايستگينی
اؤزلرينه سيغينماغينی
اشيالارا قيسيلماغينی
بيز
بير - بيريميزی
شعوروموزلا دئييل
تامام باشقا شئيلرله
آنلاييريق
سنده اولان هر شئی
منه
بير اؤپوشونله
بير سيغالينلا
بير توخونوشونلا کئچير
و يا
داها چوخ تماسلا...

سن منی
جيريلميش کؤينکلرله
قيريلميش بويونباغيلارلا
تک باشينا قويوب گئتمزسن
سن اوزاق باشی
منيم بير کؤينه یيمی
گئيينيب گئدرسن
اؤزونونکو بيليب
اونو منه قايتارديغيندا
سنين حرارتينی،
سنين قوخونو دويورام،
ياديما کوبود حمله لر دئييل،
سنين عزيزلمه لرين دوشور...
.
....................
.
اولومه اوغورسوز دئکور

بيليرم منه سويوق اولوب اولماديغينی
بيلمک ايستيه جکسن
قورخما، آنا،
قوربتده فصيللر يالنيز گؤرونتودور
کند اوشاقلارينا…
بيز اونلاری گؤزلريميزله دويوروق
ووجودوموزلا دئييل
سنسه منه داها کنديميزدن يازما
اونسوز دا بيليرم –
يئنه چاققال سسلری دولدورور
ايشيغی اؤزله ين ائولرله نم چؤللرين آراسينی

يئنه سحر آچيلاندا آروادلارينی شيکست آياق کيمی
آرخاسينجا سوروين کيشيلر گؤرونور
کند يوللاريندا
يايدا داريخان خسته لرين ياتاغينی سورويورسوز
کؤلگه لرين آرخاسينجا…
«خست» دئميشکن، آنا،
کيمسه اؤلنده
اونون پال - پالتارينی اورتايا تؤکوب آغلامايين داها
اينانين – بوتون بو سووخالار شکيللر، عاغيللار
اؤلومه اوغورسوز بير دئکوردور
اؤلومون اوزو نم ديوار کيميدير، آنا،
سوواق، بزک گؤتورمز ائله
حيات اؤزو اوغورسوز بير پارودييادير
بيزه قدر ياشانميشلارا
من ده سنه مکتوب يازاندا
ياسمینه اوخشاديرام اؤزومو –
او دا قوربتدن مکتوبلار يازارميش آناسينا
او دا منيم کيمی ياد ائللی سئوگيليسينه
دوغما چؤللری گؤسترمک ايسته ييرميش…
باغيشلا منی، آنا
من قوربتده آنلاديم –
وطن قادينلاری نئجه ده معناسيزدير
.