بایقوش

یئنی ادبیات آنلاییشینا دوغرو

یئر آیه لری

فروغ فرخزاد

چئویرن: گونتای جوانشیر

فروغ فرخزاد 15 دی 1313 – ده دونیایا گلدی. 17 یاشیندا ایکن پرویز شاپور ایله ائوله نیب اهواز – ا گئتدی. 1331 – اینجی ایلده تک اوشاغی کامیار دونیایا گلدی. بوندان سونرا فروغ – ون حیاتینداکی چتین دؤنم باشلادی؛ او قده ر کی ، تئزلیکله اریندن بوشانمالی اولدو.

فروغ فرخزادین ایلک کیتابی اسیر آدی ایله 1331 – ده یایینلاندی. ایکینجی کیتابی دیوار 1335 – ده ایشیق اوزو گؤردو. فروغ سونرالار بو اوچ کیتابینی، جوان بیر قیزین ساده و دایاز دویغولاری دئیه دیرلندیردی. اونون سون شعر کیتابی تولدی دیگر – دیر. بو کیتاب فروغ فرخزاد – ین شاه اثری تانینماقدادیر.

1337 – اینجی ایلده فروغ سینما سمتینه چکیله رک ابراهیم گلستان – لا تانیش اولدو. بو تانیشلیق اونون حیاتندا درین دَییشیک لیک لر یاراتدی. دررد ایل سونرا بو ائو قارادیر آدلی فیلمینی تبریزین باباباغیندا جزامیلرین حیاتیندان چکدی. 1342 – اینجی ایلده بو فیلم اوبر هاوزن اؤدولونو قازاندی.

فروغ فرخزاد 24 بهمن 1345 – ده تهرانین دروس – قلهک یولوندا ترافیک قضایندا دونیایا ابدی اولاراق گؤز یومدو و 26 بهمن ده ظهیرالدوله مزارلیغینین تورپاغینا تاپشیریلدی.

.....................................

يئر آيه لری

بركت ترك ائتدی يئر كوره سينی

گونش بوزا دؤندو

ياشيل ليقلار سولدو، باليقلار اؤلدو،

دنيزلر قورودو، داغلار يئخيلدی،

تورپاق اؤلولری دفن اولمونماغا قبول ائتمه‌دی

گئجه، رنگی قاچميش پنجره‌ لرده

مشكوك بير شبح تك، دايم طوغياندا …

و يوللار سونونو قارانليقلاردا

بوراخيب، نهايت تسليم اولدولار

غلبه نی، عشقی كيمسه آنمادی

تك ليك داخماسيندا دوغولدو بوشلوق

قانلاردان پيسجه بير قوخو قالخاراق

قادينلار دوغدوغو اوشاقلار بوتون

باش سيز اولدولار

بئشيك لر هاميسی اوتانديغيندان

سويوق مزارلاردا ايتيب باتديلار

نه آجی، دهشتلی، قارا روزگار

احتياج وجدانين گؤزون كور ائتدی

احتياج وجدانين گوجون، قودرتين مغلوب ائيله دی

پيغمبرلر آج، لوت

پروردگارين وعده گاهلاريندان قويوب قاچديلار

و ايتگين قوزولار

آرتيق چوبانين سسين صحرالاردا ائشيتمه ديلر

گوزوگونون اؤنونده سانكی تصويرلر،

رنگلر، حركتلر، ترس لشديلر

آلچاق آداملارين، فاحيشه لرين

اوزلرين مقدس ايشيق بورودو

آلكول باتاقليغی پيس قوخوسويلا

ساكیت، حركت سيز ضياليلاری

كامينا چكدی

زرنگار كيتابلار قفسه لرده

سيچانلار هاميسين ديديب، تؤكدولر

گونش اؤلموشدو…

صاباح اوشاقلارين ذهنينده آنجاق

بليرسيز، قارانليق بير شئی اولموشدو

اوشاقلار آنلامسيز بو سؤزو يالنيز

مشق دفترلرينده قارا لكه لرله تصوير ائديردی

روحا اؤلموش ميللت، گوناهسيز و مبهوت حيرت ايچينده

دياردان ديارا داشينيرديلار

جنايته رغبت حيسسی اونلارين

اللری ايچينده دويون لنميشدی

اؤز دهشتلرينده باتميشدی اونلار

بعضا بير قيغيلجيم، كيچيك قيغيلجيم

بو سس سيز ميللتی ترپتسه يدی ده

هدفسيز اولدوق دا ميللت هاميسی

بير بيرلرين ديديب پارچالاييردی، بو ترپه نيشده

اونلار بير - بيرينين باشلارين كسيب

آل قانين ايچينده

كؤرپه قيزلارلا بير يئرده ياتيردی اَکه* كيشيلر

اؤز دهشتلرينده غرق اولموشدولار

گوناهكارليق حيسي كور روحلارينی

چولاق ائيله ميشدی وجدانلارينی

اعدام گونلرينده دار، دار آغاجيندا

بير محكوم گؤزلرين اوووب تؤكنده

اؤزلرينه داليب سفيل آداملار

شهوتناك بير حيس‌ له

يورغون شكسته چوروك دامارلاری ائديردی ناله

بو كيچيك جانلیلار ميدانلار آرا

دوروب حيران ـ حيران

باخيردی اونلار فوواره لره

بلكه ده ازيلميش گؤزلر ايچينده

قالميشدي ياری جان، نفس‌سيز تلاش

كی او ايسته ييردی سون نفسينده

سولار نغمه‌ سی تك مقدس ايمان

ايمان باغيشلاسين بئزگين جانلارا

بلكه ده، بلكه ده آنجاق كی، ‌افسوس

گونش اؤلموشدو

و هئچ كس بيلميردی كی، اوره كلردن

اوچان او پريشان، سولغون گؤورچينين آدی عشق ايدی

آدی سئوگي ايدی

ای دوستاق فريادی!

سنين روحونداكی اومودسوزلوغون

بؤيوك عظمتی ايشيغا دوغرو

بير ايز چكه‌جك می بو قارانليقلاردان؟

ای دوستاق فريادی

ای سؤنن، بوزلاشان سونونجو فرياد …

...................................

*یئکه، یاشلی

فروغ فرخزاد حاقدا آشاغیدان آرتیق بیلگی الده ائده بیلرسیز: