نیگار خیاوی

حاميد بَی
منيم تنقيدچی اولماديغيمی بيليرسن. سنين اؤز ايسته­يين اوزرينه "هئچ­هئچه"حكايه­سيله باغلی اؤز دوشونجه و گؤروشلريمی يازديم، آما بونلار سؤزومون هاميسی دئييل، چونكو سؤزون هاميسی دئييلمز و دئييلَنمز ده! سنه يارارلی اولاجاغينی اومورام.

*
حكايه كاراكترين آرزولاريندا ياشاتديغی، ال چاتماز فرضی فضادا باشلانير، فعل‌لرين چوخو ايستك قاليبيندا گئدير:
قيشين سيزلاماسی اولايدي، استايومدا(استاديوم؟) دا هاميدان اوزاق اوتورموش اولايدين تراختورون اويونونا باخماغا. يئل اسه­يدي اوزووه، سنده(سن ده) بؤركو قاش­لاريوين اوستونه­دك چكه­ايدين...
بو فرضی فضا، قطعی فضا كيمی ده آلينا بيلر. بئله كی، كاراكترين گونلری كئچميش گونلرينين ساياغيندا كئچمكده­دير. ائله­جه ده گلجك گونلری­نين نئجه اولوب اولاجاغی اينديدن بللی دير. بونو بيز اونون دئييش طرزينده­كی هيجان­سيزليقيندان دويور، اونون سؤنوكلويونو و يورغونلوغونو ائشيديريك.

حكايه­ده هر هانكی ماجرا يا اولای باش وئرمير لاكين اونون بارماق اشاره­سيله بيزه گؤرستدييی ساده گونده­ليكلرين هر بيريسی اؤزلويونده بير ماجرادير: استاديومدا تراختورون اوينونا باخماق، خليل پخله­چی­نين توكانی، رضانين قيزلارلا داورانيشيندا ال‌سيز آياق­سيز اولماسی، بارناوا كوچه­سی، شهناز خيابانی­نين كئچميش قيليغينی آرزولاماق، شهناز خيابانيندا قار دانالارينين شهناز سئوگيلی­نين اوستونه ياغماسی و بوتون بو ساده گونده­ليكلر....

كاراكترين پسيكولوژيك بوشلوقلاری، دويغولاری­نين پوزوقلوغو، قيزلارلا ايليشكيسی حاقدا گوپلامالاری توپلومدا يايغين اولان كولتورل قارماقاريشيقليغی سرگيله­يير.
هرهانكی سوبيئكتيو فضالاردان اوزاق اولان بو حكايه، ايكی گنجين گونلرينی تام رئال‌ليقلا نمايش ائتمه­سينه باخماياراق اوخوجونو خولياوي لاكين رئال بير خيابانا سوروتله­يير. بو خياباندا دارغين، دالغين و بئزيكميش آداملارين ان باشليجا ايشی ماراق­سيز بير شكيلده يا قفه­خانايا گئتمك يا پاخلا يئمك ويا لب­لبی يئمك دی. آداملاری ماراقلانديران نسه خياباندا گؤزه دَيمير. حتا سئوديكلری فوتبال تيمی­نين اويوندان هئچ هئچه چيخماسی دا اونلارين وئجينه دئييل. بو خيابانين ليجيم­سيز آداملاری­نين آنجاق بير نوخوشلوغو وار: بير بيرينه سورتوشمك.
بو آداملار جينسل ايليشكيلرينده بئله آجيقلی­ديرلار. عشق، اونلار اوچون آنجاق: قيزی "جورلمك" ده قانونی­لشميشدير. رضا، قيزلارا اوركدن وورولور، اونلاردان اؤترو اؤلور، لاكين اونلارلا "ايرتيباط قورانممور" و هر زامان ناكام قالير. حامد ايسه، باشاريلی دير، بير ايلده يئدديسينی بلكه ده سككيزينی يئر به يئر ائلييه بيلير.

حامد و دوستو رضانين گونلری، بيربيرندن فرقلنمير، هر زاد عينی كئچير: يوروجو، دورغون. "هارا گئداخ؟"
" ماشينی قوی قالسين. گئداخ شهنازا، قيزبازليخ ائليياخ" سونوندا يولداشلارين ايكيسی­نين ده قيزبازليغی اوغورسوزلوغا اوغرايير. بيريسی اؤز ذهنينده ياراتديغی خيالی شهناز خيابانيندا خيالی سئوگيلی­سيله گزيب دولانير، اوبيريسی ايسه يئنه سئوگيلی­سينه سؤزونو دئمه­ميش قالير. ماراقلی بودور كی، "قيزبازليق" و "اوشاقليقدا دؤهتور دؤهتور اويناماق" قونولارينا من بوندان اؤنجه ده باشقا بير گنج يازارين حكايه­سينده راستلانميشديم. ائله بو دا توپلومداكی طبقه­لرين، داها دوغروسو طبقه­سيزلييين، كولتورل قارماشيق‌ليغينی و كيم­لييينی ايتيرميش انسان ييغينلارينی يامسيتماقدادير بيزه. حكايه، ديققتی جلب ائدن اينجه بير بيچيمده راوی­نين دوستو، رضانين دونياسينا دوغرو يؤنه­لير: قيز فيكيرلشير سنی نئجه باشيندان آچسين، دئسين سئوميرم سنی، بورنون بؤيوكدو، باشين تاسدی. چيركين­سن...
و بو بؤلومدن باشلاياراق، ايندييه قدرحكايه­نين ايكينجی كاراكتری اولان رضا اصلی كاراكتره چئوريلرك قالير. رضا، حامد ايله شهناز خيابانيندا دولانيركن ياواشجانا، هم اوخوجونون هم ده حامدين گؤزونو اوغورلاياراق، سونوجو دوستونا قاباقجادان بللی اولان اوغورسوز "قيزبازليغا" اكيلير.

"سورا؟ س و ر ا؟ سورا نه­دير؟" سورا، سورادان اؤنجه و سورادان سورا گلن سونرالار يوروجو و اييرنج تكرارلا دولودور. حامد، دوستونون دا سوراسينی ياخشيجا تانيير. دوروم هر ايكی دوستون حياتيندا عينی دير:
قهوه­يه(قفه­خانايا) گئتمكدير... سيقاری سيقار ايله آليشديرماقدير
سحر نشتاب بير سيقار چكيب، سونرا(سونرا؟) چای ايچمكدير
آخشاما قدر يا فيلم فارسييا باخماق يا كفله­مه چكمكدير
و بئله­جه، حكايه­نين باشلانغيجيندا اولدوغو كيمی بيتيشينده ده عينی اولايلار، لاكين باشقا بيريسينه تكرارلانير و حكايه حركتده داوام ائدير.
حكايه­نين ديلی و نثری حاقدا دئييله­سی چوخ سؤزلر وار. قالسين می "سونرا"يا؟