بوگونلر ستارخان سطير- سطير سيلينير تبريزين توركلويوندن
آز قالميش چوخلوغو آز-آز آزالير
چوخ گؤرونور دييه­سن تاريخين اَينينه تاريخده چوخ گؤرونن گؤرونتوسو
تپه گؤزون گؤزو آتيليب چيخير تپه­يه
گؤزو او بويدا گؤتورمه­يير
گوجو او آغيرليقدا چاتيشمايير ستارليغا
چكيليشير لاپ باشا دار ميلله­نير ميللي سردارليغا
تبريزين ائوي اوشاق دئييل كي ريز- ريز ييخيلا
يا ييخيلا- ييخيلا بؤيويه
تبريزلييي كرپيچ- كرپيچ بورخولا
بوشاليب يوخ اولا نقشه­نين ياخاسيندان
سنگريني استيتار ائله ستارخان
يوخسا بوردا تاريخ جوغرافياني بولدئزرلرين نيرهانيري يازار دا، پوزار دا
صوفيان سيمانيندا سيلله­يله بئتون تراپي ياپيلار سنه سنده­كي تاريخه
چوخ چوخ چوخ مرتبه­لي گؤبه­لك بينالار بيردن بيره استيتار چتيريني آچار آغرييان باشيوا
آغيلا ناغيلا سيغمايان اويون اوچار باشيوا
مندن دئمك ستارخان!
سنگريني استيتار ائله

اركين ده قولاغيندان توتوب ياواش ياواش اكيرلر مصلا دالينا
دالدالاييب ديبردينين داغيتسينلار ياواشجانا
بوگون صاباح گؤره­جكسن رئكلاميني
اوتاق بويدا بيلبوردلاردا
گؤره­جكسن چارراهلاردا
اميره­قيز نه تانيير كيمدي اميرخيز كؤپك­اوغلو
كي دونيانين گون­اورتالاشان چاغيندا قيزليغيندان توركلويونو گؤزگوره­تي گؤتوردو
ساللاخانا داشينيب مصلايا ساللاندي
دوز ائله او آندان باشلادي باشلاندي اريمك
اوتانقاج موم اولوب اريدي ارك
اوقدر اوقدر بوشالدي بوشاليندي بو نااميرخيز الينده ارليكدن
بيلميرم فشارخونو بيلميرم قان تضييقي يا دا قان باسقيسي
يوك يوك يوكسلدي سكته گتيردي ارلييي ارييه ارييه
كيمه اركؤيونلنسين ايندي ارك
ييخيلماسين ائوين ستارخان
بوراسي تاريخلي بولدئزر جوغرافياسي
سوْوخايا قالميش ائويني تئز اول استيتار ائله!