هذیان

سینیخ چرخ ته‌یه‌ری خیاوانین بویوندا فیریلدیر .... گون آخسیر سخسی گونبزلردن .... گوموش کرپیش‌لرین کیریلتی‌سینده .... بیر وار، بیر یوخ.
هاوا زعفران کیمی اون بارماغینان اون‌بئش یئریمی بارماخلیر
سورتوشوب یاخماقدا ساری نفسلرین .... هولاندیریر هاوامی فیرلاندیریب .... پیس رنگده آیاغیمین آلتین چکیر .... الیمی بوشا چاتیر.... نارینجی‌لاردا نفس تیتریر، ایندینی ساخلا... بوردا، ائله بوردا با.

سس قاشماخدادی سس وئر، قورخورام لاله خانیم
یاغیشی سالخیملاردا گؤیده ساخلاشدیر سؤز قاشماخدا
آداملار سؤز.... بولودلار سؤز .... زامان بو ایلیق زمزم هاوادی
کتان باشماخلاری جوت آیاق آلتیندا
ایندی ایندی ده‌ییر
توپراخ دا کئچر اولسا توپ‌راخ اولا بیلمز
توپراغین قیچی یوخ، توپوغو یوخ .... توپ ووروب قاچا بیلمز
ایندینی دییه-دییه ایندی قاچیر
دئدیخلاریم دوداغیننان تؤکولوب ایندییه دولمور ....خاررا-خار ایندی آخیر
گه منی باغلییاخ ایندی آغاجینا، لاله خانیم
دییم سؤیگو .... سؤیگو قوروماسین دالدالاردا
دییم ایستک ..... یولون آزیب دوننه دؤنوب دونماسین
سازی دینقیلتی‌سیندا ساخلا، کهلیی‌یین قاناتلارین هاوادا بیر آن شعره دؤندر ایندی‌لندیر اوشاماغی
گه دا، لاله خانیم
گیینیب کئچیناخ .... بزه‌نیب پودورلاناخ
بیر باخیشدا ایندی‌نین اوره‌یینی تیپ یئرینه سالیب یولدان ائلییاخ.
داریخیرام، گه دا.
ş
___________
.

Ziba Kərbasi

Sınıx Çarx təyəri xiyavanın boyunda fırıldır.... gün axsır səxsə günbəzlərdən .... gümüş kərpişlərin kiriltisində.... bir var, bir yox.
Hava zəfran kimi on barmağiynan onbeş yerimi barmaxlır .... sürtüşüb yaxmaxda sarı nəfəslərin .... holandırı havamı fırlandırıb .... pis rəhdə ayağımın altın çəkir.... əlimi boşa çatır .... narıncılarda nəfəs titrir , indini saxla... burda, elə burda ba.
Səs qaşmaxdadı səs ver, qorxuram Lalə Xanım
Yağışı salxımlarda göydə saxlaşdır söz qaşmaxda
Adamlar söz, bulutlar söz, zaman bu ilıq zəmzəm havadı
Kətan başmaxları cüt ayaq altında.
Indi indi dəyir
Toprax da keçər olsa toprax ola bilməz
Toprağın qıçı yox topuğu yox.... top vurub qaça bilməz
Indini diyə-diyə indi qaçır
Dediklərim dodağından tökülüb indiyə dolmur
Xarra-xar indi axır
Gə məni bağlıyax indi ağacına, Lalə Xanım
Diyim söygü .... söygü qurumasın daldalarda
Diyim istək .... yolun azıb dünənə dönüb donmasın
Sazı dınqıltısında saxla, kəhliyin qanatların havada bir az şerə döndər
Indiləndir uçmağı, gə da Lalə Xanım
Giyinib keçinax, bəzənib podurlanax
Bir baxışda indinin ürəyini Tıp yerinə salıb yoldan eliyax
Darıxıram, gə da.