بایقوش

یئنی ادبیات آنلاییشینا دوغرو

قادین
لاله جوانشیر

قاتل لریمین سایی – حسابی یوخدور

منیم سه یئددی جانیم وار، اؤلمورم

بابام، زنبیل آلدی منه اویونجاق دئیه

ایچینده چایدان، تاوا، آینا و داراخ.

ننه مین یورغان سیریماسینا زیلله یره ک گؤزومو بؤیودوم.

قارداشیم دوشونجه صاحبی ایدی دئدیینه گؤره

مسلک ده ییشدیریردی یئنی لندیکجه دونیا
منسه بالاجا تاوامی بیر آز داها بؤیویونه ده ییشیردیم

بؤیودوکجه کیچیلیردی ائویمیزین تاوانی

آیاغیمین آلتینداکی خالی کؤهنه لیردی

یئرده کی تاختالار قیجیر – قیجیر آغیرلیغیمی داشییردی چینینده

آدیم "اضافه"
آنلامینی بیله ر ک می قویموشدولار بو آدی؟ بیلمیره م

داها یاشیم بیر ساعت ایکن
آنام آغزی اوسته چئویرمیشدی منی.
یاسدیغین توکلری آراسیندان بیر باجا تاپیب
نفس چکمیشدیم. اولمه میشدیم،
سونرا آدیم "اضافه" اولموشدو اونلارجا

مسلک صاحبی قارداشیمین گیزلیجه سالدیریلاریندان قاچماق اوچون

چایخانالاردا یاشادیغین اه یلنجه لری بیله ر ک
سنی سئچمیشدیم ائولنمه یه

اونسوزدا اینانمادیم هئچ بیریزه
هئچ بیرینیز گرچک دئییلدیز

نه عقیده نیزده، نه سئوگی نیزده.

آللاهیزلا، آللاه سیزلیغیزلا
گیزلی آنلاشما امضالامیشدیز علیه یمه
- اؤلمه میشدیم-

پلیس، کؤینه یینین قیریق دویمه سینده

اویونجاق چایدانلاردا

یویولموش قاب قاشیقلاردا

سوپورولموش ائولرده

قتل ایزلریمی آراییر

پلیس کؤپکلرینین بورنو توخونور

مطبخ لرده کی، دوغوم ائولرینده کی جسدلریمه

توی خانالاردا رقاصه لری قوخلاییر کؤپکلر

قوینوندان پوللار چیخیر، اوزه رینده سنین بارماق ایزلرین

چایخانالارین اه ن آرخا طرفینده اون دؤرد یاشلی قیزجیغازین آلنیندا اشاره لر تاپیلیر

نفسیم ائله اورداجا کسیلیر

سنی سئومیره م اما قیسقانیرام دا ندنسه

سوچ اورتاقلاریندان نیفرت ائتمیشم

آدلارینین "اضافه" اولماسینی آرزولامیشام

تر قوخولو بدنینله ساچینی چئینه ییب پولللارینی وئرمه دن

کوچه نین قارانلیغینا ایته لمه نی ایسته میشم.

بونلاری ائتدییندن

سونرا اه ن یاخین بارا گئدیب

قدیم دوستونلا بیرلیکده "جسارتلرینین" شرفینه ایچدییندن امینم

اما هئچ بیر شئیه آجیمیرام

اونسوزدا سنی توتوبلار

همیشه اولدوغو کیمی

پلیسی، محکمه قاضی سینی بابانین میراثینا ساتین آلیب چیخاجاقسان

اما بو کز قاتللریمی پلیس کوپکلری یاخالایاجاق

یگانه شاهدسه اؤزوم اولاجام، سونونجو قاتلیمه.