- گؤیون هاراسینا سن باخسان، دیک اوردان بیر آی گؤیه­ریر.
- گئنه باشلادین رومانتیک - رومانتیک دانیشماغا.
سن باخاندا اولدوزلار آیلاشیر ائله بیل. گؤی اۆزو دولو اولور آی نان. قورخورام...
آیا باخسان قورخمازسان...من یانیندا اولسام دا، اولماسام دا سن همیشه آیا باخ!
سونرا کیشی گئدیب بیر آلایانمیش شام گتیریب گولومسه­یرک:
- بونو اوشاقلیغیمدا تاسوعا گونو مچیددن اوغورلامیشام. شاه مچیدیندن. نذیر شامی دی. قاریمیش قیزلارین نذیر شامی. آتمیشدیم اوشاقلیغیمدان ساخلادیغیم قیویر- زیویرلارین آراسینا.
قادین قالخیب بیر لامپا گتیردی. شامی، لامپانین آلتینا یئرلشدیردی. شامین ایشیغی چوخالدی.
- هه، یاخشی اولدو. بئله­سینه الیم ده قیزیشیر... هانسی یولدان گلیب چاتدین منیم چاتلاغیما؟
- بیلمیرم، منیم هوشوم باشیمدا دئییل کی... سووشدوغوم خیاوانلارین هئچ بیریسینین آدینی اوخویا بیلمه دیم
- هوشونون باشینا نه گلمیشدیکی بورا گلنده؟ کئشکه بیر- ایکیسینی اوخویا بیلئیدین
- دینمه! بیر سس گلیر، گئنه ده ساچلارینی داریرسان؟
- سن گلنه کیمین هامیسی تؤکولدو. منیم ساچیم یوخدو کی.
- گئنه اللرین اوشویور؟ ساچینی داراماغینین سسی منی بوراجان چکیب گتیردی.
- آی آللاه... نلره فیکیر وئره بیلیرسن گؤر. سن ایسته­سن تزه­دن گؤیرده بیلرم اونلاری. گؤرورسن نئجه بوشالمیشام قورخولاریمدان. بیر سؤز دئسم گولمزسن؟
- گولسم جینله­نرسن؟
- ایندی من اَته­ییمی بو یاغان قارین آلتینا آچیب، اوندان بیر اتک توپلایاجام. گؤره­جکسن،اینانیرسان منه؟
- سن نییه بو قدر قادین سان. نئجه باجارا بیلیرسن بیر بئله قادینلیغی؟
- قادین قالماق چوخ گوج ایستیر. بونو سونرالار باشا دوشدوم. گؤردوم ایچیمده قورخولو درین چوخورلار وار. آما هردن دیسکینیرم ده. قورخورام قادینلیغیمی لاپدان دانالار. ده­ییشکن گرچکدیر قادینلیق دا، حیات کیمی دی.
- بیز بیر اودون اورتاسیندا اریییریک. اللرین هله ده اوشور؟
- هارا گئدیرسن؟ گئتمه. بوردا قال قوی بیرآز هدرن - پدرن دانیشاق. سفئهلییَه­ک.
- هئچ یئره یول یوخدو. گئدیرم زئرزمیدن شاراب گتیرَم بیرآز.
آدامین اؤز ایچیندن باشقا، سیغیناجاق یئری یوخدو. بارداغیندا نه­یین وار سنین؟
- من ده شاراب ایچیرم... ساغلیغینا! قورخورام بیر- بیریمیزین یانیندا دا اؤز ایچیمیزی تاپا بیلمیه­ک. الیم قیزیشسا گئده جکسن؟
- نوش اولسون... ایکی آغاج اکمک ایستیرم آدیمیزا عزیز. بیر- بیرینین یانیندا. هئچ کسیلمه­یه جک اولان ایکی آغاج... دونیادا ان چوخ سئوودیین آغاج هانسیدیر؟ سن ائله­ هر آخشام سسینی اَکیرسن گولداندا؟
- هر آخشام. اؤزو ده کؤلگه ده. اؤزو ده یول یئرییه- یئرییه. من چوخ یول یئریمیشم. اما آخیردا گئنه باشلادیغیم یئره چاتمیشام. تؤوشولو- تؤوشولو. چکیل بیرآز یان دور مندن. آیاغیم قانا باتیر. پالچیغا باتیر. کؤرپه­یه باتیر. اللریم کؤرپه­یله دولودو. اللریم کؤرپه تیخی لا دولودو. بیر توکانین بوتون صابونلارینی آلدیم، دوز بیرگون بیر دان سوره­سی حامامدا قالیب اللریمی یودوم. اللریمین قوخوسو گئنه چکیلمه­دی. سونرا یوخودان آییلدیم. آما تک ایدیم. سن منده گیزلنمیشدین. سنی گیزلتمیشدیم.
- من اوشاقلیغیمدان بَری گئجه­لر سنین یوخونو گؤروردوم.. 9 - 8 یاشلاریمدان بیر قادین یاشاردی منله. او سن ایدین. ایندی ده سنین یوخونو گؤرورم.
- هئچ بیلیرسن من نئچه قارین دوغموشام؟ بیلیرسن نئچه قارین، اوشاق زیان ائله­میشم؟ بو شَهَرین مریضخانالاریندا هرگون دوغوب هر گون زیان ائله­میشم. الیمدن جانا گلیب شَهَرین بوتون مریضخانالاری دا. هرگون منه بیر دار آغاجی قورولور. آسیلیرام هر گون. .... باغیشلا! بونلاری سنه نییه دانیشیرام آخی. منی یوخلاریندا نه جور گؤرورسن، هن؟ هئچ اولماسا بیریسینی دئه، تئز اول، تئز اول دئه!
- ایسته دیکلریمی آنجاق یوخودا سنه آچیقلییا بیللم. آما سن یوخولاریما گلیب گیزلَنیرسن، اونا گؤره­دی بیر- بیریمیزه تانینماز قالیریق. بارماقلاریوا باخ، بوز قندیلی کیمی آسلانیب.
- گئنه تک قالاجام سن گئتسن. سن منه خییوو چایی نین شوﯙلوکلریسن. اؤزومو سندن کئچیرده بیلمیرم. سندن کئچه بیلمیرم.
- یوخولاریمین بیرینده گؤردوم سن بیر دره ایچینده باغیریرسان. بدنینین هریئریندن آچیلیب یومولان آغیزلار جوجرمیشدی. سن باغیردیقجا او آغیزلار یئره اله­نیردی. سنی ساچلاریندان تانیدیم. یئره اله­نن آغیزلار آچیلیب یومولاندا، آچیلیب یومولان آیری آغیزلار ائشییه فانتاللیردی. دره­نین ایچیندن بیر شَهَرجه آدامین باغیرتیسی گلیردی.
- یوخولارین چین دی. هه یادیمدا، یادیمدا! باغیریردیم او گون. اولارین هامیسینی من امیزدیرمه­لی ایدیم. سن ده گؤردون، ائشیتدون؟
- هه... سنی گؤروردوم. آما ها گوجَنیردیم، ائشیدنمیردیم. سسینی آییرد ائدنمیردیم بیر شَهَرین باغیرتیسیندان. نفس کوشولتوسو، آت کیشنرتیسی، سئل کوکره­مه­سی، پارتلاییش، قان آخما سسی، ماشین قیژیلتیسی، سن اونلاردان نئجه قورخموردون؟ آیاغیوا ایلیشن جنازه لردن دیسکینمیردون به؟
- قورخونون اوزونه دورموشدوم او گونلر. آما اؤزوملوک دئییلدی. اؤزوم سئچمه­میشدیم او وضعییتی. اونا گؤره ده شیشمه­یه گلمز. هامی او گونه قالمیشدی یانی. قَنوولاردا لاخیم - لاخیم قان. هئش کیم اؤز جانینین هاییندا دئییلدی. هرکس او بیریسینین هاییندایدی. دمیر سسی، توستو اییسی گلیردی آغیزلاردان. آغیزلار ائله بیل بیر ماققاجلا آچیق ساخلانیلمیشدی. گؤزلر یومولو قالدیقلاری یئرده دوندورولموشدو.
- سورا سنی گلین آپاریردیلار قارقالار هر آخشام اوستو. قیزلار ال - اله وئریب اوخوردولار و قارقالارین توشویلا قاچا - قاچا لاپ قاباغدا اوچان قارقانی بیر- بیرینه گؤرسه­دیردیلر:
گلین او دی! یوخ او بیریسی دی! بوداخا بوداخا گلین بودو، دئییردیلر.
- اصلینده من هئچ بیر یول دا گلین کؤچمه­میشم. منی گلین کؤچورتمه­دیلر. گلینلیک دونو گئیینمه­دن منه گردَک اوتاغی بزه­دیلر. درزیلرین باش قاشیماغا ماجاللاری یوخ ایدی. هامیسی کفن بیچیردی. قوی گؤروم ... یوخ! گردَک اوتاغیم دا اولمادی هئچ منیم. دئدیلر قان، سو یئرینه آخیر.
گلینلیک دونونون اته­یی قانا باتار عاییب اولار. من ده اوتاندیم. اوتاندیغیمدان یاناقلاریم پؤرتدو. منی بزه­مه­دیلر ده گلینلر کیمین. سونرا اؤز الیمله دوداغیما، یاناغیما قان چکیب قیزارتدیم. گؤزه­ل اولدوم. دیرناغلاریمی دا خینا یئرینه قاننان بویادیم. آنام جئهیز صاندیغینی آچیب قیرمیزی یایلیق گتیردی. بئلیمی باغلاماغا قاینیمی چاغیردیلار. آچیلیب یومولان آغیزلارین آراسیندان آییرد ائدنمه­دیلر اونو. آتامی فیرقه­چیلیکده آسمیشدیلار. اونا گؤره بؤیوک قارداشیمی چاغیردیلار منه خئیر دوعاسی وئرمه­یه.
- " او اؤزونو فلسطین مللتینه نیشانلاییب گئدیب"، بویلو آروادی دئدی.
اورتانجیل قارداشیمی چاغیردیلار "دوستاغدان بیر دسته چیریک­نن قاچیب، نمی - نیشانی یوخدو" دئدیلر. کیچیک قارداشیمی چاغیردیلار، "کوکتول مولوتوف نان اویناییر"، دئدیلر. آتام ائویندن، خئیر دوعاسیز یولا سالیندیم. نیشانلیم، باشیمدان قیزیل آلما آتماغا داما چیخاندا، باشیندان گولله­لندی. الینده­کی قیزیل آلما دیمیرلاندی دیمیرلاندی گئدیب گردک اوتاغیما چاتاندا پارتلادی. آنام دئدی: "سنه دئمه دیم قانا باتارسان؟" من اوتاندیم
- سنله من، آجی گرچکلر ییغینجاغیییق، ظالیمین قیزی! توکلریم بیز بیز اولور، دریم اولدوز - اولدوز.
- قورخورام گرچکلیییمیزدن...
- سنی آلماق ایستیرم
- سن گلنه کیمی منی آلیب آپاردیلار. من آلینمیشام.
اللرین ایستیدن اریییر شام تکی. اووجونون ایچی تَر مونجوغویلا دولودور.