بؤيوک شهرلرین تک ياشاملاری....

– شوویتر، کوبئک – رئيمئر شیرکتی، صاباحیز خئییر- بلی باغلاییرام ...ايسته ديییز خط ایندی مشغولدو. گؤزله مک ايسترسیز؟
– شوویتر، کوبئک – رئيمئر شیرکتی، صاباحیز خئییر. بو، سحرین دوققوزوندان آخشامين بئش، بئش یاریمینا قدر بئله سوروشان بیر تئلفون سسی واریميش. چوخ آدام بئله دئییر. ناهارالاری ائودن گتيرديگيم يولاف اَزمه سينی يئییرم. شيرکت، تئلفونون باشيندا بو جور ميخلانيب قالماغیمی آلقیشلایاجاق دیر. ناهار چاغی تئلفونون باشيندا بیرینین اولماماسی یاخشی گؤرونمز.

ايکی ایلدن بری کیچیک بير ميکروفونو اولان بير قولاقليغيم وار آما بويون آغريلاريم هله ده یئرینده دی. هر يوز تئلفون ائله یندن ان چوخ اونو تشککور ائله ییر. اما من، بير رسمی مقامی يادا بير شیرکتی آرایاندا مرکزده کیلرله اؤزه لليکله ادبلی دانیشارام. موسیقینی موسیقی ائله ین سس تونودورسا، من ده شيرکتيميزه زنگ ائله ینلر اوچون ايلک سس، ايلک ايزله نيم اولورام و ايلک ايزله نيم ايلک قراردیر هر زامان.

حتی باغلاديغيم زامانلار، آرالاردا یاخشی بير کيتاب اوخوماغا پالیشیرام. گونده بئش صحیفه دن چوخ اوخوماغی باشارا بيلديگيم گؤرونمور. بوگون ساده جه اوچ. بوتون گون قارماقاريشيق ایدی، هر شئی. بئله، دونيادا کيم وارسا هامینین – تانرینین دا – زنگ ائله دیگی گونلر اولور. باشقا گونلرده اون بئش دقیقه دن بیر.

دوکتور بويون آغريلاريم اوچون سيخ - سيخ يئریمه یه گئتمه لییم دئدی. آخشاملار ائوه گلندن سونرا آياغيما تئز راحات بير باشماق کئچيريب، گونه باخيش پروگرامينا قدر يئریمه یه چيخیرام. ترک ائديلن بئنزين دوراغینین اؤنوندن کئچيرم. ایندی اوردا لئيلاکلار ياشاییرلار. بعضا اطراف قارانلیق اولاندا بيرنئچه ساپ قوپاردیرام. بونا کيمسه نين بير شئی دئمه مه سی لازيمدیر اصلینده. لئيلاکلار، بئنزين دوراغی باغلاناندان بری کيمسه یه عاید دییرکی آرتيق... گوشه ده منيم گئتدیگیم داواخانانين ويترينيند تزه بير آریخلاما دستورو وار. آدی آچل. "ا " حرفی آک آغاجی شوروبو، "چ" حرفی چيچک توزو، ل حرفی ليمون دئمکدیر. هارداسا باشقا هئچ نه يئميرم آما هئچ ده آریخلامیرام. بوی آيناسينا باخماق و اؤزومدن راضی قالماق ایسته ییرم ساده جه. بونو اؤزوم اوچون ایسته ییرم.
اونسوز دا منی بوتون گون هئچ کیم گؤرمور. بئله دوشونسک، نئجه گؤروندویوم ائله ده فرق ائله مز.
آما منيم اوچون ائله دییر، فرق ائلر. من ايشه گئدرکن ده هر زامان گؤزل گئیینه رم. کيمسه گؤرمور دييه شولا ول اولماقدان خوشوم گلمز.

من آخشاملاری هر زامان يئمک ماساسينی دا حاضيرلارام. هئچ بير زامان سوسيس کالباس کیمی شئيلری بوشقابا قویمامیش یئمه رم، سوتو قوتوسوندان ايچمه رم. هوهئنزوللر جاده سينده کی شارکوتئره چوخ تزه، قاریشیغی اولمایان، یئمه لی سالادلار ساتير. سون زامانلاردا بوندان دا واز کئچديم آما. سالادداکی مايونئز ياغ گتیریر، وزن چوخالدیر.

آلتی یاریمدان سونرا، توکانلار باغلانینجا کوچه لر بیردن – بیره اؤلوم سس سيزليگینه بورونور.
هوهئنزولنئر جادده سینی باشدان باشا يئرییرم. اما هئچ واخت لئوپولد جادده سينه قدر گئتمیرم. اورا، يازلاری قدیم بی اوغلو جادده سی کیمی دیر. کیشیلر اؤزلرین آچیق هاوادا قهوه ايچن کیمی گؤرسه دیب، اورالاردا گزه ن، اوتوز ياش آلتينداکی هر قادينی باخيشلارييلا سوزورلر. بن بونا اَت بازاری دئييرم. اوتوز ياشيما گلمه میشدن قاباق دا بئله شئیلر خوشوما گلمزدی. دوزدور کی هله اوتوز یاشی آشدیغیم دا چوخ اولمادی.

لئوپولد جادده سینين اؤنوندن سولا، ويلهئلم جادده سينه دؤنورم و کلئمئنس جادده سينه قدر يئریمه یه دوام ائله ییرم. هر زامان عینی يولدان گئتمه يه آليشديم. کیچیک دَیيشيک ليکلری حیس ائله مک، عینی لیگی عینی لیک اولاراق تکرارلاماق منی راحاتلادیر.
بو ايری، گور قارا ساچلی آدامی، بورالاردا قاباقلار دا چوخ گؤرموشدوم. هر زامان تک. ائله سینه گزیب دولاشير. بعضا بير کونجده دوروب، دالغين - دالغين، اللری آرخاسيندا آخان ترافيکی سئير ائله ییر. منيم ياشلاريمدا اولمالی دیر. یاخشی گؤرونوشلو بيری دَییر، آما خوش اؤزه ل بير هاواسی وار. بوندان آرتیغینین منه دخلی یوخدور. هر نه قدر ائله گؤرونسه ده. هوهئنزوللئر جادده سيندن همن سونراکی، یوخاری قیمته مال ساتان توکانداکی يئنی آياق قابيلار منی نه قدر ايلگی لنديريرسه او دا منی او قدر ايلگی لنديرير.

منیمله عینی جهتده، یاواش – یاواش ايره لَله ییر. بير نئچه متر سونرا اونو کئچيرم. دوکتور، دورمادان یئریمه می سؤيله دی، يوخسا هئچ بير آنلامی قالماز. اونو آرخامدا حيس ائله ییرم. بوگون آچيق توسی بير ژاکت گئییب، يوخسا چوخ زامان ماوی گئییر. مندن داها ياواش يئریییر آما بؤيوک آديملار آتير و سونرا همن يانيمدا بيتیر بیردن بیره. منه بير باخيش آتیر. من داها دا یئیین له ییرم. کلئمئنس جادده سينده کی آغیر ترافيکه گؤره آرتيق آدديم سسلرينی ائشیده بیلمیرم. دؤنوب باخماقدا ايسته ميرم. بللیدیر کی چوخدان گئتميش دير. بير ويترینين اؤنونده دورورام، بیردن شوشه ده گؤرونور. آی آللاه، دوز دالیمدا دایانیب!

بو آنا قدر اولانلار بير راسلانتی اولمالی دیر. بلکه يئنه ده ائله دیر، بلکه ده او، دوغوردان دا بو هديه ليک اشيا ساتان توکانداکی چوخ باهالی آما آنلامسيز قیویر - زیویرلارلا ايلگيله نير. دالییا باخمادان، دؤنوب يولوما دوام ائديرم. هيجاندان دوراجاقميش کیمی چارپان قلبیمه عصبله نیرم. آخماق قیز، هله گونون گون اورتا چاغیدیر، هر یئر ده ایشیق. آدامين بيری سجهwابينگ’ ده گزمه یه چیخمیش و تصادوفا منيمله عینی توکانین اؤنونده دورموش. سونرا، يئنه آدديم سسلرینی دويماغا باشلاييرام. یئیینله ییر، ههشه کی يولومو دَیيشديريرم. بلکه اونون الیندن قورتولا بيله رم، قاچماغا باشلاييرام، هوهئنزئللئر جادده سينه گئريسين گئرييه قاچیرام. بؤیرومه سانجيلار گیریر، همشه بئله اولور. و مکتبده ایکن بونا گؤره بدن ائيتيمی درسلريندن معاف اولموشدوم. بللی بير ياشدان سونرا قاچماغی بوراخماق لازيمدیر. اينسان آرتيق اوتوبوس دالیسیجا قاچیب اؤزونو گؤلمه لی گونه سالمامالیدیر. ان ياخشیسی بير سونراکی اوتوبوسو گؤزله مک. فريئدريجه جادده سی بويونجا، بؤیرومو توتا - توتا قاچاراق گولمه لی گؤرونورم. قانيم قولاقلاريما چيخير. آرتيق اونو ائشیتمیرم، دایانیرام. بير ائوين دووارينا سؤیکه نیب، دینجیمی آلیرام. سانجيلاريم کسيلير ياواش - ياواش. باشیمی ترچه دیب، اؤز – اؤزومدن اوتانیرام.

بلکه ده بو، چوخ تک قالماغیمدان قايناقلانير. بئله حاللاردا، خيال قورمالار، اؤز اؤزونه دانیشمالار باشلانار و اگر اينسان اؤزونه ديقت ائله مه سه باشینا وورا بیلر. "آننا! هيستیريک، آخماق، ياشلی آننا!" دييه سؤيله نه رک يولوما دوام ائله ییرم.

اول کؤلگه سينی گؤرورم. اؤنومه کئچير و منه سيريتیر. عجیب بير سس چيخاردیرام. بونو دئمک ايسته یيرم اصلینده . جهننم اولوب گئدین، منی راحات بوراخین! نه لر کئچير عاغلیزدان؟ اما آغزيمدان يالنيزجا بو عجیب سس چيخير و او گولومسه ییر.
بو دؤنه قاچمیرام، سرت آديملارلا يئریيیرم. آرخامدان گلير. گلديگيم يولدان گئرييه دؤنوب، داواخانانی، ترک ائديلميش بنزين دوراغینی کئچيرم. باشقا بير شئییه فیکیرلشمه یه چاليشيرام. آدديملاری دوز دالیمدا. گلير... "تاپ! تاپ! تاپ!" اولمور، آياق سسلری اوزوندن باشقا بير شئیه فیکیرله شه بیلمیرم. بير تاکسی کئچير. اونو ساخلاتدیرا بیلردیم. چوخ گئج اولدو. ایندی ائوه گئتمه لیدیم دييه دوشونورم آما هاردا، هاردا گیزله نه بيله رم کی او گؤزدن ایته نه قدر؟ آيريجا کسينليکله دلی یه اوخشامیر، حتی چوخلاریندان داها یاخشی گؤرونور. ائوه گئتمک ايسته ييرم، آنجاق ائوه. قاپينی کيليدله ييب، تئلويزيونو آچماق...
او زامان هر شئی بيته جک.

دوز آچاری تئز تاپانمیرام. او آرخامدا تيکيلير. يوخسا من بينانين قاپيسينی گؤزو باغلی آچا بيله رم. سونوندا آپارتماندان ايچری گيريرم، آغير گيريش قاپيسينی ياخشیجا قاپاييب، آسانسورو گؤزله مه دن، نفس سيز، اؤسکورکلر ايچينده اوچ قات يوخاری قاچیرام. ائوه گيريب، سورگونو چکيب، کيليدی اوست اوسته چئويريرم.

تئلويزيوندا ان سئوديگيم شو پروگرامی وار. نورمال زاماندا من ده حدسلر وورورام. حدسیم دوز چیخساف اؤزومو بير تیکه شوکولات ويا بير، حتی بعضا ده ايکی قدح کونیاکلا اؤدوللنديريرم. اما دیقتیمی پروگراما وئره بیلمیرم.

بارماقلاريمين اوجوندا سس سيزجه قاپييا ساری گئدیب، گؤز باجاسیندان باخيرام. کوريدور قارانليق و بوشدور. هالبوکی مطمئن اولا بیلردیم... قاپينی آچيرام، گئتديگيندن امين اولماق ايسته یيرم. من داها باخامیشدان او آياغينی قاپینين ائشيگينه قویور. چوخ قورخورام، سسيم چيخمير. ايچری گيرير، قاپينی اؤرتور.

"نه ايسته ييرسیز؟" دئييرم ادبلی بیر شکیلده، چوخ ادبلی. باشینی ترپه دیر، گولومسه ییر. يينه بو عجیب گولومسه مه. آشپازخانایا گئدير، سویودوجونو(یخچال) آچير. منيم سویودوجومون ايچينده نه اولدوغونو سانکی چوخ ياخشی بيليرميش کیمی کره ياغی و ژامبونو چيخارديب، ماسايا اوتورور و چؤره یینه ياغ سورتمه یه باشلايير.

"لوطفا، مندن نه ايسته ييرسیز؟" قاپينين قولوندان توتورام. قونشولارا قاچا بيله رم آما بير بازار گونو کئک پیشیرمه یه یومورتا ایسته ینده، اولماديغينی بهانه ائله ییب وئرمه ین قونشولاريما می قوچاجام. يئنی قونشونوندا يومورتاسی يوخدو. منه ناغیل دئمه سینلر... قاپيمين دوز قاباغینا قویدوقلاری اوشاق آرابالارينی بير داها اورا قویماسینلار دئدیگیم اوچون مندن خوشلاری گلمیر.

"پوليس چاغيراجام" دئديم. قرارلی، چوخ قرارلی بير سس ايله. منه باخیر. اوزونده چوخ اؤزه ل بير شئی وار بو آدامين. ایندی يئمک يئيیر، سونرا؟ منی بوغازلايا بيلر، سويا بيلر!.. اوتورما اوتاغينا ساری قاچیب، قاپينی کيليدله ييب پوليسه زنگ وورورام. آشپازخانایا دؤندویومده سوتون هامیسینی ايچدیگینی گؤرورم. من قهوه می دوز – امللی سوت ايله ايچه رم. ایندی، صاباح سحر تئزدن سوت آلماغا گئتمه لییم. بو دا ان آزيندان اون دقیقه داها تئز دورماق دئمک دیر. اينسان بئله آليشيلماميش دوروملاردا، عجیب، معمولی شئيلر دوشونور.

"پوليسه زنگ ووردوم. ایندیجه گلرلر."

بلکه ده منه اينانمير. توکو ده ترپشمیر. ديرناقلاری تميز و باخيملی دیر. ساندويچينی چنگل - پيچاقلا يئيير. چنگل له منی دليک دئشيک ائاییه بیلر. گولمه لی بير اؤلوم، گولمه لی بير قادين اوچون. گؤز آلتی ساعاتا باخيرام. پوليسه زنگ ائله دیگیم دؤرت دقیقه اولموش. دوغوردان دا قورخمالی گؤرونمور.

"مندن نه ايسته ييرسیز؟" دييه سوروشورام اوچونجو دؤنه. جواب يوخدو. آشپازخانا قاپيسينا بير اوتوراجاق ايته له ييرم. گؤزله ییریک.

گلن پوليسلرين ايکيسی ده منه شک له باخیرلار. کسين ليکله ایگیرمیدن آرتیق یاشلاری یوخدور.
پوليسلری آشپازخانایا آپاریب، اونو – آدامی – گؤرسه دیرم. او ايسه، اللرينی ماسانين اوستونده قووشدوروب، گولومسه ییر. سونرا درين، مئلوديک بير سس تونو ايله "خانیم سجوارز – منی دئییر - منيم بير قوهومومدور. عمی میزین قویوب گئتدیگی ميراث کونوسوندا آراميزدا بالاجا بير آنلاشمازليق چيخدی". بوتون بونلاری تماما ساکين و گولومسه یرک دئییر.

من ایسه ته ته – پته یه دوشورم. و بير شیرکت ایشچیسی اولاراق بونون نئجه شککه سالان، احمقانه معنالار وئردیگینی چوخ یاخشی بيليرم. بيری گئرچکدن وقت آلیب، یا یالاننان آلیب کیمی گؤرسه دیر تئز باشا دوشه رم. ته ته – پته یه دوشمه سیندن بیله رم. "من... من بو آدامی کسينليکله تانيميرام". دييه ته ته – پته یه دوشورم. ته ته – پته یه دوشدویوم اوچون ده بو يئنی آند ایچمه نی پولیسلرین گؤزونده ایتیرمیش اولورام.
"منی تعقیب ائله دی. من گزمه یه چيخميشديم. و منی تعقیب ائله دی." دئييرم داها آنلاشيلان بير شکيلده. چیین لرینیی ترپه دیر. "دوزدور. خانیم سجوارز – ی تعقیب ائله دیم چونکو نه زامان تلئفون ائله سم، تلئفونو يوزومه باغلاییر. ائله ائله مه سئیدیم قاپينی منه آچمازدی."

"آياغينی قاپينین آراسینا قویدو، ايچرييه زورلا گيردی. آند ایچیرم، بو آدامی داها اؤنجه هئچ گؤرمه ديم." باخ بوراسی یالاندی. اصلینده من هئچ يالان دانیشمارام آما ایندی کونو اونو داها اؤنجه کی يئریمه یه گئدیشلریمده ده بیر چوخ درنه گؤرموش اولدوغوم دَییر.
"عمی قیزیمدی و ایندی منی تانيماق ايسته میر." دئيير. پوليسلر
کيمليگینه باخیب، دوروش پوزيسيونلارينی دیيشدیریرلر. بيری: "عاییله وی مسئله لریزی اؤز آرازدا حل ائله مه لیسیز" دئيير. قاپيدا منه اينانمالاری اوچون آند وئریریم. بيری دئییر: "عمی اوغلوز زورا باش وورماق ایسته سه بيزه زنگ ائله یین."
"او منیم عمی اوغلوم دَییر!" دييه باغيريرام داللاریندان.

تلئويزيون قاباغیندا اوتوروب، خبرلره باخیر. "پوليسلرين يانيندا چوخ جالیب ایدیز دوغروسو. اما ایندی گئدين. سيزدن خواهیش ائله ییرم، گئدين!" تئلويزيونون اؤنونه کئچيب قاباغینی کسیرم. خبری الدن وئرمه مک اوچون بوينونو اوزادیر. سونرا آياغا قالخيب، او بیری کاناپه نی یاخینا چکیب،اؤز اوتوردوغونون يانينا قويويور. باشييلا منه کاناپه نی گؤرسه دیب، يئنيدن يئرينه اوتورور.

اؤزومه بير کونياک تؤکورم. اونا دا وئريرم. "ساغ اولون" دئيير. بو اونون منیمله ايلک دانیشماسیدیر. بیرلیکده تئلويزيونا باخیریق. اوزون و اينجه اللری، يئنه اوزون و اينجه اولان قیچلارینين اوستونده دورور. تئلويزيونداکی بيرشئيلره گولور بير آرا.
ايکينجی کونياکلاری تعارف ائله ییرم.
"بورا چوخ گؤزهه لدیر." دئيير، گولومسه ییرم. ائويمين دوزه نلنمه سينه چوخ امک وئرديم. بوتون رنگلر اويوملودور. دووارلاری سامان رنگی کاغيذلا کاغیذلاتدیم، کاناپه لر قارا - قيرميزیدیلار. بو کیچیک سئويملی ائو منی هر آخشام يئنيدن موتلو ائله ییر.

اوزاقدان کنترلو اونا ساری اوزادیب، "ايسته ديگيز کانالی سئچين، نه یه باخمامیز منه ارنملی دَییر" دئييرم. بير پوليس فیلمینده ساخلاییر. من بئله گئج ساعاتلاردا پوليس فیلملرینه باخماغی سئومیرم. سونرا یاتا بیلمیرم. اگر تک اولسام البته. سيلاحلار، پارتلامالار، آجی - آجی قیشقیرمالار، ... "مندن نه ايسته ييرسن؟" دئييرم، گوللَه ياغیشی ايچينده منی ائشیتمیر. اوتوراجاغی منیمکینه ياخینلادیر و آدامين بيری گنج و گوزه ل ساريشینين بوغازينا الينده کی پيچاغی داياديغی آندا من تيتره مه یه باشلايينجا اليمی توتور. فيلم بيتيب، ائکران قارلانينجايا قدر ده وئلله میر. ائله سینه اوتوروب، بوش ائکرانا باخیریق.

"صاباح ساندويچ چؤره یینی آلارام"، دئيير. "قهوه ن اوچون سوت ده آلارام."

صاباح جومه دی. ايشدن ساعات دؤرتده چيخاجام. هفته سونلارينی هئچ سئوميرم. باشقا گونلردن فرقلی بير شئی اولمور کی. قالخيب تئلويزيونو باغلاییرام. سس سيزليک، قورخونج بير سس سيزليک... گزينتيمی يئنه عینی شکيلده سوردوره بيله رم.
بلکه او يئنه اوردا، ويلهئلم و کلئمئنس جادده لرینين بيرلشدیگی يئرده دير. اوزونده چوخ اؤزه ل بير شئی واردی.

سونرا يئنه او بنزين دوراغیندان کئچیب، بير دسته لئيلاق توپلايا بيله رم.هئچ کيمسه چيچک وئرمير منه. هفته سونلاری اوچون، تئز – تئز ، اؤزومه چيچکلر آليرام.
اونلاری اوتورما اوتاغینداکی گیرده ماسانين اوستونه قويوب، گئ ديب گلديکجه اییله ییر و هئچ تانيماديغيم بيرینين يوللاميش اولدوغونو خیال ائدیرم. هئچ کيمسه چيچک وئرمير کی منه.