.
آبورتون دؤلت قييمتی اوتوز‌مين ماناتدير بيزيم اؤلکه‌ده
منسه آنامين قارنيندا ياريمچيق بير دؤلم هله، وور- توت دؤرد هفته‌ليک
بو گون سوووراجاقلار منی اومئقا آلتيله
اونسوزدا آناما مصلحت‌لرينی ائشيديرديم قادينلارين.
عزيزه، دئييرديلر،
آبورت گوناه دئييل، او ساده‌جه بير اينگيليس سؤزودور
معناسی نه‌یی ايسه ياريدا کسمک، ساخلاماق.

هر بير قادینين بؤيوک آرزوسو "فوق الانسانی دوغسايديم من" ديرسه
آبورت قاباغی ايلاهی ترددودلر کئچيرمه‌سی بونداندير اونلارين
داهی آناسی اولماق احتمالينی الدن بوراخماق ايسته‌مزلر
بير وئدره صابونلو سويو دؤشه‌مه‌يه ائندريب
آياقلارينين باش بارماغینين اوجويلا موختليف فيقورلار جيزيرلار
آدام آدلاری يازيرلار، آدلاردان بيری ائله اوزون اولور کی شپاقات آچيب ييخيليرلار
و آغلاييب اينجيلين 35-جی آيه‌سينی دوشونورلر.
آبورتسا اؤز نؤوبه‌سينده گوناه دئييل
او ساده‌جه بير اينگيليس سؤزودور، معناسی نه‌يی ايسه ياريدا کسمک، ساخلاماق.
ايندی من آنامی ساکيت‌لشديرمکده توختاقليق وئرمکديم
اونونسا آللاهين سسی گلير قولاقلارينا، آبورت ساعاتی ياخينلاشديقجا.
يئری گلميشکن، گؤره سن باس* دير، يومشاق تئنوردور*، يوخسا سوپرانودور* آللاهين سسی؟

او گونده اللی سئرومو سوووران، قانلی اللرينی يويان
و چئک اوزادان آغ خالاتلی قادينا باخ
مودروکدور سندن فرقلی اولاراق، آنا. بيلير کی
آنالارين ائولادلارا وئرديگی ان بؤيوک خوشبخت‌ليکدير آبورت.
آرتيق دوغولموش اينسانلار بورجلو دئييللر آنالارينا
اونلارا وئريلن حياتا، چالينان لايلايا گؤره.
نه بورجلوسو، جانيم؟ ياريمچيق دؤل کيمی سون وئريلن بيزلريک اصیل بورجلو آنالاريميزا.
سادجه ياريمچيق دؤللر دونياسيندا ايتمه‌مک اوچون گرک بيزه ده آد قويسونلار.
آما سئودا دئييل، احتراص کيمی آدلار
چونکو سئومک گئتديکجه داها چوخ وئرمک و وئرمک
احتراص‌سا گئتديکجه داها چوخ آلماق و آلماقدير.
آز قاليب، سنين مندن، منيمسه حياتدان آزاد اولاجاغيم ساعات ياخينلاشماقدا
سنی آغريداجاق بو عمليات، بيليرم آنا،
آنجاق حاضير اولماليسان ائولادینين سعادتی يولوندا بوتون فداکارليقلارا
بعضا زامانی مکاندان بوشاتديرماغا.
ائشيتميشم آبورت تؤر - تؤکونتولريندن بر بزک دوزلديرلر
ائشيتميشم بو سببدن داها پارلاق و قاليجيدير "لانکومه" دوداق بويالاری
"پوپا" فيرماسینين ساختا کيپريکلری بو سببدن داها اورکوخلاديجي‌دير.
گولومسه، آنا، من سنين اوزونده انليک و کيرشان کيمی ياشاياجاغام!

.

____________
.
* باس، تئنور، یوموشاق تئنور: سس تونلاری
** آبورت: سقط جنین