نئچه گون قاباق من اوشاقلاریمین لَله سینی گؤرمه یه اونو ایش اوتاغیما چاغیردیم. آخی پولیا واسیلوونا ایله حسابیمیزی دورولتمامیز لازیم ایدی. لَله اوتاغا گیرجک دئدیم:
- پولیا واسیلوونا! خواهیش ائله ییرم بویورون حئسابیمیزا یئتیشک. حتما سیزین پولا احتیاجیز وار. اما سيز او قدر اوتانجاقسیز کی احتیاجیز اولسادا دئمییه جکسیز... یاخشی، سیزه آیدا 30 مانات وئرمه یه راضیلاشمیش دیق.
- باغیشلایین، قراریمیز 40 مانات ایدی...
- یوخ، 30 مانات ایدی... من دفتریمده یازمیشام. من هئچ واخت اوشاقلاریمین لَله سینه 30 ماناتدان آرتیق وئرمه میشم... یاخشی، سیز ایکی آیدیر کی ایشله ییرسیز.
- باغیشلایین، ایکی آی بئش گوندور.- دوز ایکی آی... او جور کی دفتریمده یازمیشام، دوز ایکی آیدی. بس بو قراردان سیزین مندن آلاجاغیز آلتمیش مانات اولور. یاخشی، بوندان دوققوز گون تعطیل لرین پولونو چیخاق.

سیز قبول ائله ییرسیز کی، یکشنبه گونلری مینیم اوغلوم کولیا - نی قویوب دولانماغا گئدیردیز.
بو ایکی آیدا یکشنبه گونلریندن سونرا اوچ گون داها تعطیل یمیز وار ایدی.
پولیا واسیلوونا نین هیرسیندن اوزو قیزاردی. اؤزو بیلمه دن نئچه دؤنه بتردن دوداقلارینین جوجوگونو ترپتدی... اما بیر کلمه دیلینه گتیرمه دی...
- دوققوز یکشنبه اینن اوچ بایرام... بئله لیکله 12 مانات چیخیلار... دؤرد گون ده اوغلوم خسته لنمیشدی، لَله یه احتیاجی یوخویدو. اوچ گون ده سیزین دیشیز آغرییردی و خانیم سیزه ایستراحت ایجازه سی وئردی. اون ایکی نن یئددی اولار اون دوققوز. آلتمیش ماناتدان اون دوققوز مانات چیخسام... اولار... نئچه اولار؟... قیرخ بیر مانات... دوز اولار؟
پولیا واسیلوونانین سول گؤزو قیزاریب جوجویونده بیر داملا یاش گؤروندو و چنه سی تیتره دی... او هیرسلی – هیرسلی نئچه دؤنه اؤسکوروب دسماللا گؤزلرینین یاشینی سیلیب بورنونون سویونو آلدی... اما دیلینه بیر سؤز گتیرمه دی...

- سیز بایرام گئجه سی بیر دنه ایستیکان – نَلبکی سیندیردیز... ایکی مانات دا اونلارا گؤره چیخیلار. البته بو ایستیکانین اوندان داها قیمتلی اولدوغونو بیلیرسیز. چونکو آتا – بابا یادگاری ایدی. اما جهننمه کی، باشیزا تصدوق، ائله همین ایکی ماناتی حئساب ائلییه ک... بو دونیادا بیزه او قدر ضرر دَییب کی داها عادت ائله میشیک... هله سیزین دیققت سیزلیگیزدن اوغلوم آغاجا چیخیب،کؤینه گی جیریلیب... یاخشی اون مانات دا بوردان چیخیلار. یئنه ده سیزین دیققت سیزلیگیزدن، تزه گتیردیگیمیز قوللوقچو، قیزیمین بیر جوت باشماغینی اوغورلادی... آخی ائوده بو جور ایشلرین مسئولییتی سیزنندی. سیز گرک دیققت ائلییه سیز بو جور ایشلر اولماسین... بو ایشلر اوچون آیلیق آلیرسیز... یاخشی، بئش مانات دا بوردا چیخیلار... ژانویه نین اونوندا سیز مندن اون مانات آلمیشدیز... پولیا واسیلوونا یاواشجا دئدی:
- من سیزدن بئله بیر پول آلمامیشام!
- سیزین یادیزدا دَییر... من یازمیشام!
- اولسون ایندی کی بویورورسوز قبول ائله ییرم...
قیرخ بیر ماناتدان ایگیرمی یئددی مانات چیخین اولار اون دؤرد... ایندی هر ایکی گؤزوده قیزاریب یاشالمیشدی... جوان قیزین اینجه، اوزون بورنونون اوستونده تر داملالاری گؤروندو. بئچارا قیز شاشیرمیشدی. گؤز یاشلاری قیرمیزیف یوموشاق صوراتیندان آخا – آخا تیترک سسله دئدی:
- من تکجه بیر دؤنه پول آلمیشام. من سیزین خانیمیزدان بیر دؤنه تکجه اوچ مانات آلمیشام... داها سیزدن پول آلمامیشام...
- دوغوردان؟ نئجه اولوب من بونو یاددان چیخاردیب یازمامیشام. چوخ ساغ اولون... بس بو قراردان اوچ مانات دا اون دؤرد ماناتدان چیخیلسا قالار اون بیر مانات...
خانیم بویورون بو سیزین پولوز... سایین اوچ مانات... اوچ مانات... اوچ مانات... بودا بیر مانات اولار اون بیر مانات. بویورون آلین...
من اونون ایکی آی ایشینه اون بیر مانات وئردیم... پولو آلیب تیترک اللرینن جئبینه قویدو. سونرا یاواشجا دئدی:
- ساغ اولون!...
من یئریمدن دوروب اوتاغیمدا یئریمه یه باشلادیم. هیرسیمدن بوغولوردوم. جوان قیز منه حئیرتله باخیب بیلمیردی نئینه سین. آخیرده اونون قاباغیندا دوروب دئدیم:
- سیزین بو ساغ اولوز نه اوچون ایدی؟ تئز دئیین سیز نه اوچون مندن تشککور ائله دیز؟!
- پولدان اؤترو... مرحمت ائله دیگیز پولدان اؤترو.!
- آللاهین بنده سی! مگر گؤرمورسوز من سیزین باشیزا بؤرک قویدوم. یئنه ده ساده جه دئییرم، من سیزین پوللاریزی اوغورلامیشام! پس بو ساغ اولون نه اوچوندور؟!
- هله یاخشیدی کی سیز حئسابدان سونرا بیر پول وئردیز... آیری یئرلرده آدامین آیلیغینی وئرمیرلر کی هئچ، بوشلودا سالیرلار.
- آیری یئرلرده سیزه پول وئرمیرلر؟ حئیرت ائله مه لی ایش دَییر! من سیزله بالاجا بیر شوخلوق ائله دیم. سیزه حیاتدان بالاجا بیر درس وئرمک ایسته دیم. من هشتاد ماناتین هامیسینی سیزه وئره جم. بو سیزین حاققیزدی. من بو پولو قاباقجادان حاضیرلاییب پاکاتا قویموشام. باخین پاکات میزین اوستونده... اما نئجه اولار آدام بو قدر دیلسیز – آغیزسیز اولسون. نییه ناحاق یئره سیزین آیلیغیزی چیخاندا اعتراض ائله مه دیز؟ نییه دانیشمادیز؟ بو دونیادا دیری اولا – اولا حاققی قوروماماق اولارمی؟ آدام بو قدر بوش اولارمی؟
جوان قیزین دوداقلاریندا آجی بیر تبسم گؤروندو، اونون غیرطبیعی گولومسه مه سیندن فیکرینی اوخودوم:"بلی اولار."

من اونا وئردیگیم بو آغیر درسدن اونو بیر مودت کدرلندیرمیشدیم. عذر ایسته ییب قاباقجادان پاکاتا قویدوغوم ماناتین هامیسینی اونا وئردیم. جاوان قیز یاشامینین باشا باشیندا ایلک دؤنه اولاراق تام حاققینی آلدیغیندان حیرتلندی. او باشینی آشاغی سالیب ال – آیاغینی

ایتیرمیش حالدا اوتاقدان چیخدی. من دالیدان اونا باخیب فیکیرلشدیم:

- بو دونیادا گوجلو اولوب ظلم ائله مک نه قدر راحات ایشدیر.