کؤنلوموز اولان دونياميزی دارالدان
عشقيميزين بؤيوکلویودور.
قورخما!
بيز قدر گوجلوسو
بيز قدر بؤيويو يوخدور عالمين!

دونيانين اَن دورو گوزگوسونو سئچ
اؤزونو يئردن سالاملا
ديز چؤک اؤز قارشيندا اه ييل!

ق و ر خ م ا ا ا !
بوتون وارليق
2 عاشيق ساعاتيميزدان اوزون دئييل.



" . . . "
عاغيلا ديله سيغمايان
سؤيلنمه ميش بير ناغيل!
سامانليغی سئيران ائدن
بير کؤنول ايشيدير!
زامانا مکانا
عنعنه یه ارکانا
مصلحته ماسايا سيغمايير سئودا!

*

نه دونيا نه فلک!
قيپ قيزيل، تيليت قان؛
بير اووووج داماردير يئری: اوره ک!
آلما بويدا ايکن
بوتون وارليغی ايچينه آلماغا واردير يئری.
گؤيوس داشييا بيلر آنجاق
سود يولو کيمی کوزه يه،
آی- گونش کيمی کاسايا سيغمايير سئودا.

*

"قضا" قدر بير اولايدير:
يولو، يئری، يوردو يوخ!
قارا قاباق- قارا قاباق دولابلارا وارما!
قارا قابيقلی کيتابلاری آختارما!
قيوريلما قاضی بی!:
قضاوته قانونا
ياسايا ماسايا
سيغمايير سئودا...