اصیل آدی کمال صاديق گؤیجه‌لی اولان ياشار کمال، 1923 ايلينده آدانانين عوثمانييه شَهَرینه باغلی حميته کندینده دونیایا گلدی. هله اورتا مکتب ایللرینده ایکن خالق ادبیاتینا دويدوغو علاقه، اونو فولکلور توپلاما ایشینه چکدی. او دؤنمده شعرلری، آدانا خالق ائوینين يايينی اولان گؤروشلر درگيسنده ياييملاندی. اورتامکتبین سون کیلاسیندا ایکن مدرسه دن آیریلماغا مجبور اولدو. او، کارگرچیلیک، دویو تارلالاريندا سو گؤزتچی‌لیگی، عریضه یازیچیلیغی، کیتابخانا ایشچیسی، موعللیم لیک کیمی ايشلرده چاليشدی. بو آرادا اولکه، کووان، ميللت، بئش‌پينار درگيلرينده، شعرلری یاییملاندی. 1951 ايلينده ايستانبولا يئرله‌شه‌رک، جمهورييت قزئتینده کاریکلماتور ايله گزارش يازارليغینا باشلادی. "دونيانين اَن بؤيوک تارلاسیندا يئددی گون" باشليق‌لی گزارشی ایله، قزئته چيلر جمعييتی اؤزل باشاری اؤدولونو قازاندی.

او ايللرده ناغیللاری ایله ده دیققت چکن کمالین، 1952 ايلينده "ساری ایستی" آدلی ناغیل کيتابی ياييملاندی. ايلک رومانی "اينجه ممد" 1955 ايلينده چيخدی. 1955 - 1984 ايللری آراسيندا ناغیل، رومان، رؤپورتاژ ايله مقاله‌لریندن اولوشان 33 کيتابی ياييملاندی. ياشار کمال، ايلک رومانی "اينجه ممد" ايله 1955 ايلينده وارليق رومان اؤدولونو قازاندی. 1974 ايلينده "دميرچيلر بازاری جينايتی" آدلی اثری، مادارالی رومان اؤدولونو آلدی. "يئر دمير، گؤی میس" فرانسه ده 1977 ايلينده، ادبيات منتقیدلری سئنديکاسی طرفيندن ايلين اَن ياخشی خاریجی رومانی سئچيلدی. "مين بوغالار افسانه سی"، 1979 ياز دؤنه‌می اوچون بؤيوک ادبيات ژوريسی طرفيندن سئچيلن کيتابلار آراسيندا يئر آلدی.

1982 ايلينده اولوسلارآراسی "دئل دوجا اؤدولونه" لايق گؤرونن ياشار کمال، 1984 ايلينده فرانسه نین لئگيون د'هوننئور (Légion D'Honneur) نيشانینی آلدی. اثرلرینده؛ توروسلاری، چوخورووانی، چوخورووا اينسانی نين آجی ياشامينی، ازيلمه لرینی، ایستیثمار اولمالارینی، قان داعواسينی، آغاليق ايله تورپاق سورونونو، تاثیرلی بير بيچيمده اورتايا قويموشدور. 29 ديلده ياييملانميش اولان کيتابلارييلا، دونيا ادبیاتیندا چوخ اؤنملی يئری واردير.