شعرلر

کئچن ایل بو چاغلار
ماسان اوزه­رینده
آلدین سییانور آرزیلارین
تک – تک ایچینه.
الین زویوبده،
بانکا بالیغینی
سوچلادین دنیزلییینه.
سن، بئله
چاغریلمامیش قوناق اولدون
توپراق تویونا.
سن، بئله
ایذین دیلنمه­دین
گئجه ایچمه سینه
قارانلیق قوسماسینا.
سن
بیر
ایکی
دؤرد یوخودایکن
اوچ
اوچوش . . .!
یعنی تانری پازئلینین بیریسی یوخموش،
سن قوسارکن
تانری آپ – آغ قایتاریلدی یئرینه
ائرلیکسه قیپ – قیرمیزی
کؤپوک لندی
بویویوب، لخته لندی؛
تانری بئله گئتدی اؤزونه
ائرلیییین هله منده
سوزورم سییانور اوره­ییمه.

کئچن ایل بو چاغلار
ماسان آلتیندا
بیر سییانور
آرزیلاریلا بیر
توزا دؤزموش
اؤزلم­لرین اؤلوم یئمی اولموش،
قوت­سوز
بؤجک­سیز اللر گؤزله­ییر.
منده تانرینی
او قیرمیز نئونلو اوره­ک­لرین
ویترین لرینه قایتارماق ایسته ییرم.
آما ائرلیییمی بیریسینه تاپشیرمادان، بئله.
منی بیر کز بئله آرامایین
من،
بیر
ایکی
دؤرد یوخودایکن
اوچ
اوچوش
یعنی، تانری پازئلینین ایکی سی یوخموش . . .!
.
________

.

دئمک
یئنه ده بیر دؤنوش
قاییدیش
تملسیز دؤور،
ساییسی:
1 – دن تانری اؤلومونه دک
آجی لار ائنینده
قارانلیق لار بویوندا
یاشام مساحتلی
اؤلوم حجمینده
آچیلیب – باغلانمیش
دییافراگم کیمی
سانکی کیپریک یاشاماسی؛
یعنی
دوروم – دوروم
تانریلارا قوربان وئریلمکدییک
دوعالار کیمی بیر شئی لرله قانیمیزدا . . .
سونوج
یونله­ریک، آغیر آغری دوروم لاریندان
ساری ایلانلار سوروسونه ساری . . .
اینان
ماس – ماوی لیک لر آلیر جانیمیزی.
آی! منیم ائکیز قارینداشیم
ندنسیزلیک گبه­لیییندن
دوغولان
یادداشیق:
سن،
منیم بیرینجی یاریم
منسه،
ایکینجی لره باغلانمیش یارین!
سؤیله جانیم
آرامیزدان
تانری لار
یوخسا آرازلار
کئچدیمی؟
بؤلوشدوک بوتونلویوموزو بیز
یوخلوق قدر اوجوزجاسینا!
من
صیفیردان سونراکی یوخسوللوق­لاری باشلادیم،
سن
صیفیردان اؤنجه کی وارلیق لاری بوسبوتون . . .
. . . آنجاق!
اینان! . . .
گؤوده­میز
ساری ایلانلار اوچون
یاشیل­لیق بئجریلمه­دن،
بیرلیییمیز
یوخلوق­لارا ایچیریلمه­دن،
صیفیردا گؤروشه جه­ییک . . .
.
__________

.

اولدوز
اودون آتیلاجاق
آی
بئنزین جالاناجاق
اوی . . . !
گئجه قوشلاریم
قانادلارینیز
گؤزلرینیزده کی اوچوش فوتوراف­لارینیز
اولدوز تؤحفه­لی یوخولارینیز
آنا یوردونوز
آتا یادیگارینیز
یاللی یالازلاردا یاناجاق
بیر آزدان گئجه ائوجییی اودلاناجاق
ائرلییین قاققاسیندا قانلی دیش­لری
قیزارداجاق
دوزن­لری
داغ­لاری
بیله آلا – بزک ماسکالار اویاناجاق لار
کیپریک – کیپریک
قارغیش­لار قاریلدایاجاق
ان اوجا اوجقارلاردان.
قیریلمامیش گئجه قورشاغیندان زامان
سئللول – سئللول
قورویون گئجه نی
سئللول لارینیزلا
دوستاق سئللول­لاردا
همن
قوریون اونو
ده­رینلییینیزله
یولداش – یولداش.
اونودمایین
اودلاناجاقدیر بیر آزدان. . .
قوغمایین دامارلارینیزدان گئجه­نی
سؤندورون ایشیق­لاری
اوشویون بیر آز
بیر آزدان اودلاناجاقدیر . . .؛
اینانین قارانلیغین گوموشلو ایزینی
ایسترسه دانین
ایزینیزی!
پیلاکاردلار قالدیرمایین توکنمه­سینه
قولاق­لارینیزی شوشله­یین
گئجه ماهنی­سینا:
بایقوش­لارین مئلودوسونا
قوردلارین آکورداسینا
قالخین همن آیاغا
سوسون سوسموش دوروملارینیزدا
سایقی­لایین گئجه نی
سوسون دئییرم
بئله حیوان قارینداش-لارینیز سوسسونلار
اویسونلار
ائله جه
ده­رین­لیک­لرینه دویدورسونلار
قارانلیق قورتولوش سسی دیر
بیر آزدان اودلاناجاق دیر. . .؛
کؤکسومون هؤووشنه­سی بیتینجه دیر فیرصات!
زامانسیزلیغا قیریلا بیلرسینیز هله
آلا – بزک سئوگی لردن بئله

*

همن بیریسی
بیلمم ارکک­می؟
یوخسا دیشی
او
ساری دامارلی
قیپ – قیرمیز
کیشی
تورباسی الده
یاراسا قاریلتیسی ایله بیرگه
دنیزدن چیخیب
داغ لاری آشیر
آلنینیزدا قازیر:
رزیل لیک­لر سارایینی
دولو دئموکراسینی
خنچر- خنچر یاخشیلیق­لاری
خوش گؤردوک
هؤوشنه­سیز کؤکسولر.
بیر آز اؤنجه اودلاندیمی؟ – سانیرام – گئجه
کیمسه­ییز گؤرمه­دی کی!
قورومادی کی!
یازمادی کی!
ایل­لردیر
ایل . . . لر
ایل­لر اؤلومومدن اؤنجه
بئله­جه یوخا چیخدی گئجه
گئجه – گئجه



قارا – قارا
اوزلر
ایزلر
گؤوده لر
اوزولور
قازیلیر
آسیلیر
گؤزلریمین آپ – آغ گیله سینده؛
دیمدیک­لنیر خیرخیرام
هایقیریرلار بوغازیمدان
باش­لاری بیچیلمیش قوش­لار
دنله­نیر بئینیمین سئللول­لاری
آلقیش­لاییرلار بئینیمی قانلی قانادلار
اوچولار بئینیم بیرآزدان
کابوس­لارین اوچوشودور
یاسدیغیمدان
اوچوش­لارین کابوسودور هر آنیم
ترسینه ساییلماقدادیر دیقه­لر بیله­ییمده
فصیل لر ده­ییشه بیلمز بیر داها منده
دایانیر تانری­نین ساعاتی بیردن
گولوم باغیشلا
آساجاغام باخیش­لارینی آیدان
اولدوزلارا دؤنجه­یم آرزی­لاریندا
دؤنه بیلمه­یه­جه­یم یوخو یول­لارینا بیرده
گولوم
قورو گؤیرچین­لیینی
اوچورت چیینیندن قارتال­لیغیمی
دوستاق­لیغا دال
یوخسا اؤدول آلارسان
قارا آلین­لیغینی
آزادلیق سئورلیییندن
قاپیدان قایتارمالییام معصوم لوغونو
گئری دؤن
قارانلیق دان باشقا بیر شئی قالماییب منده
قارانلیق دان باشقا
باسا بیلمرم الینی
باشقا بیر اله.
قوووشسان ایر
قییاجاغام سنه گولوم
قارا شال ساللایاجاغام هر گونونه
گلین­لییینی تاپشیراجاغام
قانلی قانادلارین الینه
بورادا
زنجیرله یرسن اومودلرینی
ساری ساچلی نین بلکه دؤندویو گونونه
منیم تک
سوفره آچیلار بئینین
سوره­لر اؤنجه­دن
کابوس­لارا هر گئجه
گولوم
اوزون رومان­لاردا ایتیرمه­لی سن ایزیمی
اینانما منه
اینانمیرام ساری – ساچلی نین دؤنوشمه­سینه
گلیب ده دیقه­لرین
گوموش توزو بوروموش یولونو
آیدین لیغا کورییه
اینانمیرام
اینان
باش قویارکن
اوچوش آرزی­لاری­نین اوچوروم­لارینا
قاناد دوتوب
اؤتجه­یم من
بو ساری – ساچلی­لار ظولمتیندن!

______________

یالنیز یولون یاریسینا دک
یئتر
قاییت دوغوشونا ساری
آیلا داراقلایاجاغام
دیلک لریم بویدا ساچ­لارینی
اومود اولدوزلاری اکه­جه­یم
گؤزلرینده
گؤی – قورشاغینی ائندیره­جه­یم
قاش­لاری­نین یئرینه
بورنون لا تانیتدیراجاغام
چییک لره
دوغما قوخولارینی
دوداق­لارینلا بللی ائده­جه­یم
آریلارا
دوزه­لتدییی بال­لارین آجیلیغینی
اوف . . .!
سوچسوز جئیرانیم
سنین کی ده­رین
گؤی بویاقلی بولودلاردان
نئجه قییدن اؤپولمه­یینه
سنین کی دامارلاریندا آخیملایان
گؤک – سئوگیسی
نئجه قییدین گلین گئتمه­یینه
اونلار!
قارا – آلین لیق لارینی کادولادیلار سنه
حایات قارانلیغینی ریمئل چکدیلر گؤزلرینه
کوفله­نمیش قوخولارینی یئدیرتدیلر بورنونا
زهرلی اؤپوش­لرینی یاخدیلار دوداق­لارینا
اوف . . . دئمک
گئیدیردیلر
21– ینجی عصرین فاحیشه­لیک دونونو
سوچسوز جئیرانیما
ایندیسه باخ! سئوگیلی­وی­نین
نئجه آددیم­لادیغینا
دوغودان
باتییا
نئجه شرف­سیزلییی
پاپیون دویونله­مه­سی بوینونا
21 – ینجی عصرین ایرنج گؤزه­للیک­لرینه باخ!
گؤزه­للییینی ایرنج­لییینده دوی!
مریم بکارتینه عیسی­لار توخونور
گئری دؤنه­یدین کئشکه
گئری
سنی سؤز وئرمیشدی
ایل­لر اؤنجه
قیز – کؤپروسو منه
یابانجی عصیردن قاییدیشی دوشونه­یدین
یولون یاریسینا دک
یئتردی
منسه
جانیمین داغ­لاری ایله بیرگه
اوجا – اوجا داغ­لاردان
قیز – کؤپروسونون اوتاییندان
دؤنردیم سنه ساری
اوف . . . سوچسوز جئیرانیم
دوغوشون 21 – ینجی عصیرده
اولو سوچویموش
21- ینجی عصیرین الی چاتیب دئیه سن
کؤپرویه
بیرلیییمیزی بؤلوب ایکی­یه
ایندیسه گئجیکمه­دن
دؤنه بیلریک دنیزلیییمیزه. . .




بالا قانینی یاخدیلار یاخاسینا
آنالیغینی لعنت ائدرک
داغلادی برکتینی دؤش­لرینده
قارامان­لار کورتاژ ائتدی قارنیندا
گئجه­نین آی اوراغینا تاپشیردی آی­لارینی
دانسولاناراق آچدی
گؤزلرینی هر سحر
داملا – داملاسینی اؤده­یه­رک
گونلرجه گونشه
ایللرجه سویوناراق بیر ائلین شرف­سیزلییینه
سؤز وئردی توپراغین شاه – داماری:
- آلاجاغام «بالاجا قارا بالامی»
داش - ائویندن
دنیزلییینه قایتاراجاغام اونو - .
اوف!
بالا قانینی یاخمیشدی لار یاخاسینا
قییمیشدی لار آنالیغینا
بیر آزدان
یاغاجاق
داملا – داملا آجی­لارینی دونیا باشینا
«ارک»ه آچ قاپی­لارینی – دئیه
او اسکی سیرداشینا
اولدوزلار اؤزیله
اولدوزلاری گؤیدن
آی – اوراغیلا بیرگه
یئرله گؤیدن
گؤرسه­نیلمه­مزلیک­لردن
آخیندیراجاق شهرین هر بیر یئرینه . . .
تانریلا یاشید آجی­لاریندان سرخوش
آشاراق
یان – یانا
آی ایشیغیندا
بیر توپراغین شاه – داماریندان
غئیرت بسله­نجک دامارلارا
کؤپروسوز باخیش­لار دولاراق شهره
ائشیدیله­رک «سئویرم» سؤزو
بالیق قولاق­لاریلا
نازلاندیرا – نازلاندیرا ساری گلین­لیک­لری
اؤکسوزلر اوره ییندن داش قابارلاری آلماغا
پنجره اؤنونده
قوروموش
ناموس­سوز گؤزلری چالماغا
«بالاجا قارا بالاسینی» آلاراق داش – ائویندن باغرینا
آراز کئچه جک شهرین اورتاسیندان. . .