.
نه قدر کئچمیشیمی گزیرم یادیما گلمیر بیرینی داشلامیش اولام. ذاتا اوشاقلیقدان قالابالیق آدامی دئییلدیم. بؤیودوکدن سونرا عسگرلیک ایللرینده یامان اوشاقلارین اوووجونون آچیلماسینی گؤردوم، اونلار عسگرلیکده باشلارینین توکونو دیبدن قیرخدیراندا بوتون یارالارین یئری باشلاریندا گؤرونوردو. آمما من توکلریمی دیبدن چالسامدا بئله، اوندا هئچ درمانا دا بیر یارا یئری تاپیلماز. یالنیز بیر یول باشیم یارالانیبدیر، "آغ یوخوشـ"و اوز یوخاری چیخیردیق، خالام اوغلو یولون اوستونه چیخیب، اورادا اولان کیچیک داشلاردان منه دوغرو آتماغا باشلادی. هئی دئدیم ممد داش آتما، سؤزه گئتمه‌دی. بیر زامان بیر داشین باشیما ده‌یمه‌سینی حیسس ائتدیم، اوندا گؤردوم ممد اکیلیب آرادان چیخدی.

کیچیک داش یاراسی‌نین یئری ایندی داها قالماییب‌دیر آمما او اوشاقلیق گونونون شیرین خاطیره‌سی اوره‌ییمده اؤزونه یئر آچیب‌دیر.
نه ایسه ایل‌لردن بری، او گون اوتوز بیر یاشیم اولاراق بیریسینی داشا باسدیم، ایندی‌ده عاغلیما سیغمیر او یئکه داشلاری هانسی گوج توللاییردی. یول اوزونو «یوشانلی»‌نی گئدیردیک. نییه و هارا گئتمه‌ییمیزی خاطیرلامیرام، آنجاق حیاتدا بعضا یوللار ائله بئله‌سینه‌دیر، آنلامی و مقصدی بللی اولمور. آرابالاردا بیر نفره یئر اولمادی، اونا گؤره‌ ده بیر نفریمیز پییادا یولا دوشدو، منده او تک قالماسین دئیه ائندیم، آخی کندیمیزین گؤنئی طرفینده یئرلشن بو یول‌ و بو داغلار حیاتیمدا ان زنگین یئر توتان، دوغما دیلیمی دوغوران وارلیقلاردیر.
یولداشیمی تانیمیردیم، آنجاق بیلیردیم کی بو ایگیرمی‌اوتوز ایل‌ ایچینده تهرانا یا کرجه کؤچن عائیله‌لرین بیریسی‌نین اوشاغی‌دیر، ماراقلی­ایدی او دانیشدیقجا قانیم قایناییردی، نهایتده بیر ایگیرمی‌اوتوز مئتیر اوندان اوزاقلاشماغیمی و یوخاری طرفدن اونو داشا باسماغیمی بیلدیم، بیریسی ایسه هاردان تاپیلیب آراچیلیغا گلدی آمما اونو دا داشا دولادیم، سانیرام او آندا بوتون دونیا و حتی تانریدا اورا گلسه‌ایدی داشلایاجاقدیم. ساواش چوخ چکمه‌دی و او ایکی نفر یالواریاخار ائدیب تسلیم اولدولار. اونلار نهایت حیرت ایله بو ایشین نه‌ده‌نینی سوردولار. باخیشلاریندان بللی اولان منی بلکه ده بیر دلی کیمی تصور ائدیردیلر. گؤزلریم داغلارین بولاقلاری کیمی دولوب، گون باتان بولودو کیمی قیزارمیشدی.

دوغروسو منیم بوتون وارلیغیم بو داغلاردا یاشادیغیم گونلرین میراثی­‌ایدی، بو داغلاردا من یاساق دئییل دیم. بو داغلاردا من دویونجا اؤزلویومو یاشامیشدیم، آمما یولداشیم بو خاطیره‌‌لری و بو وارلیغی بولاندیریردی. یول اوزونو اونون اؤزگه دیلده دانیشماسی و منی اؤزگلشدیرمه‌سی هئچ ده دؤزمه‌لی دئییل‌ایدی.

بونو باغیراراق اونلارا دئدیم. بو سؤزلر داشا باسدیغیم یولداشیمی دا اوشوندوروب اونا تکان وئردی و باشی آشاغی‌یا دیکه‌لیب مندن اؤز دیلیمیزده باغیش دیله‌مه‌یه باشلادی. یولوموزو داوام ائتدیک.
داغلار، سره‌لر، یاللار هئچ ده‌ییشیلمه‌میشدیر. اورادا اؤزگه‌لیکدن باشقا یاساق بیر شئی یوخ‌ایدی.