.

دئمک اولموردو قادین شه پیتلری آیاغینا گئیمیشدی یا شه پیتلر قادینین آیاغیندایدی. بیری گئدیردی، او بیریسی ده دالیسیجا. بیر اوتاقدان او بیری اوتاغا، هالدان آشپازخانایا اوردان دا ایش اوتاغینا. قاپی، بیر الین ایته له مه سی ایله جیریلداییب آچیلدی. اوتاغین اورتاسیندا بیر نئچه اوتوراجاق و بؤیوک بیر یازی ماساسی واریدی. هر یئر بؤیوک – کیچیک کیتابلارلا دولویدو. هر کیتاب اؤزونه اویغون بیر جیلده بوکولوب، یان – یانا قفسه لره دوزولموشدولر. بو اوتاغا چوخ آز گلیردی، ناهاردان سونرالار هئچ واخت، سحرلر ایسه چوخ آز. سون زامانلار بو اوتاغا گلمک داهادا آزالمیشدی، آیدا بیر ایکی دؤنه. قاپینی آچیب اطرافا باخیندی.
اوتاغین همشه اونا تزه لییی واریدی و اونو همشه بو حالا سالیردی؛ اوره ک دؤیونمه سینه. ائله بیل اری اوردایدی، اوجا بویو ایله، بوغدایی ساچلاری و دویونلنمیش قاشلاری ایله. ماسانین آرخاسیندا اوتوروب کاغاذلارین اوستونه اه ییلمیشدی. ایندی اولان آنجاق دووار ساعاتینین تیک – تاک سسی ایدی و قلمین کاغاذ اوسته گاهدان یئیینله ییب، گاهدان دا یاواش – یاواش ایره للَه مه سینین سسی.
ساعات اونو ایییرمی دقیقه کئچیردی. اری کلاسدایدی. اقتدارلا اوستادلار سککی سینین اوستونده بیر طرفدن او بیری طرفه آددیملاییردی. اونونلا بیر چوخ گؤز گلیب گئده رک بوتون حرکتلرینی ایزله ییردیلر. اودا ائله اول جلسه ده هر شئیی بیر طرفلیک ائله ییردی: "من اللی اؤیره نجی یوخ، اللی هئیکل ایسته ییرم. باشا دوشدوز؟" سونرا دا جاوابینی آلماق اوچون دوزلتدییی هئیکل لرین آغیزلارینا گؤز تیکیردی.
نملی دسمالینا بیر قات داها ووردو. بو ایشی گؤرمه لیدی؛ بو اوتاغین توزو آلینمالیدی. سون تمیزلییی نه واخت ائله میشدی؟ یادینا گلمیردی. خاطیرلادیغی قدر اه ن سون اری اونا دئمیشدی: "بوندان سونرا منیم ایش ماساما توخونمایاجاقسان." سونرا دا اؤزونه بیر ایستکان چای تؤکمک اوچون دالینی اونا چئویریب آرتیرمیشدی: "هر شئیی قاتیب قاریشدیریرسان. سن گئدندن سونرا آرتیق هئچ نه اؤز یئرینده دییر."
قاپینی یاواشجا اؤرتوب، ساللانا – ساللانا ماسایا ساری گئتدی. کاغاذ دسته لرینی آغیر – آغیر گؤتوردو، آلتلارینا دسمال چکیب دقتله اؤز یئرلرینه قویدو. سونرا یئنه ده آیری بیر دسته نی گؤتوردو. ماسانین ساغ طرفینده رنگلی و بؤیوکلویو فرقلی بیر آز کاغاذ واریدی. اونلار اینجه – اوزونویدولار، رنگلری ده گؤی ایدی. بو گونه قدر بو کاغاذلاری گؤرمه میشدی. اوستلرینده قیسا سطیرلرده بعضا صحیفه نین اورتاسینا قدر اوزانان بیر شئیلر یازیلیب، سونلارینا تاریخ قویولموشدو؛ 1377 تیرین اونو، 1377 موردادین اوچو، 1378 فروردینین اوولی و... بیرینین تاریخی ائله بو دونن ایدی؛ 1378 خوردادین ایییرمی بئشی. عنوانین قاباغیندا بو جومله گؤرونوردو: "سوسن قبول ائله سین." ارینین اونا خیانت ائله دییینی بیلیردی اما شعر یازدیغینی یوخ، بیلمیردی.
بیر آن، ماسانین آرخاسینداکی فیرلانان صندلده اوتوردو. بویو قیسا دییردی اما ندنسه آیاقلاری یئره چاتمیردی. الینی اوزادیب قلم قابیندان روان نویسی گؤتوردو. یاشیل ایدی. شعرلرده بو رنگله یازیلمیشدیلار. بلکه ده بیر شئیلر یازماق گؤیلونه دوشموشدو. اما روان نویسین قاپاغینی گؤتورمه دی.
ساللانا – ساللانا آشپازخانایا قاییدیب دسمالی حامامین قاباغیندا یئره آتاندا هله ده بیر شئیلر اللرینده آغیرلیق ائله ییردی.