.
بیر صا‌باح چاغی
گونشین ساچی
یاییلدی ائوه
سوزدو گوزگویه
دوردوم آیاقا
گوزگویه باخدیم
ساچلارین هورموش
بیر قیز اوتورموش
گؤزگو ایچنده
قولاق‌لاریندا
گیلاس‌دان سیرقا
دیرناق‌لاریندا
گول یارپاغلاری
مانیکور اولموش
خیردا اورکی
حسرتله دولو
گئجه یاتاندا
رویا‌لاریندا
قولچاق گوروردی ،
ساری ساچلی بیر
گولن قولچاقی .
تنها‌لیقیندا
قوجاقلاییردی
نایلون قولچاقی .
دیک‌دابان‌لاری
ایتنده اونون
چوخ آغلامیشدی
ائوجیک‌لری ده
قوروتمامیشدی
یاشلی گؤزلری
اوونمامیشدی
حزین اورکی .
بیر گون اوتورموش
نایلون قولچاقی
دیزلری اوسته؛
ناغیل دئییردی
ساری ساچلی بیر
گولن قولچاقدان
اؤز قولچاقینا.
آناسی گیرمیش
ساچلارین اؤپموش ؛
اوندان ایسته‌میش
گؤزلرین یومسون.
گؤزلرین یومدو
اورکینده تئز
بیر دیلک توتدو.
آچاندا گؤزون
نه لر گؤرموشدی؟
بیر کاموا قولچاق
گؤزلری گولر ،
دوداقلارینا
یاغمیشدی چیچک ؛
ساچلارین هوروب
تام اؤزو کیمی
قولاق‌لاریندا
آما سیر‌قا یوخ .
گؤزلرین یوموب
بیرده آچدی او
حسرت‌له باخدی ،
خبر یوخییدی
ساری ساچلی بیر
گولن قولچاقدان .
دیلی توتولدو
گؤزلری دولدو .
آناسی آلدی الین –الینه
محبتیله باخدی اوزونه .
چاره‌سیزیدی ؛
کاموا دان گئییم
گئیین قولچاقی
گولن قولچاقی الینه آلیب
غصه‌لی گؤزله
دولی حسرتله
آنا بوینوندان
بیرده آسلانیب .

آه..........
نه گون‌لریدی
چوجوق‌لوق چاغی


اؤزومه گلدیم
بیر آن گؤردوم کی
گونش اوز توتوب
کؤلگه اوتوروب
گؤزگو اوستونده .
هوروک‌لی ساچلار
حسرت‌لی گؤزلر
باخیردی اوردان
بیر جوت قارا گؤز
بولوت‌لارینی
یاغیردی اوردان .