ساعات گئجه ­نین اون قیرخ­ دوققوز دقیقه­سی، تیک... تاک... اوچ ثانیه سونرا بیر حادیثه باش وئره­جک. قادین، اوشاق­لاری شام یئمه ­یه چاغیریر. ایکی ثانیه اؤنجه، ساعات اون اللی دقیقه اولوب. آنا، باخ، مویاد قویچاغیمین ساچ­لایینی یویدو... اوننان نه ایشین وار موراد؟!... کیشی، اوغلووا بیر سؤز دئیه ­نمیسن؟!... تیک... تاک... آنا باخ، قویچاغیمین باشی چئچل اویدو... ماجرا باشلانیر. کیشی اوتاقدا ایش­لرینه باخدیغیندا، زامان دایانماییر. زامانین یئرینی هئچ زاد دولدورمایاجاق. قادین الینی قالدیریر. مطبخ بیچاغی پاریلداییر. اوتاغین ایشیغی چوخالیر. هر شئی، زامانین دوستاغیندادیر... کیشی، چارپایادا ییرغالانیر. چارپایانین جیریلتیسی، قادینین سسییله قاریشیر. سیقار یاندیریر. سیقار توستوسو، قالین بیغ­لاری­ آراسیندان چیخیر. زامان، کاغیذلارا ساری یورویور. آغ کاغیذلارین قارانلیق بوشلوغوندا، نسه بیر حادثه اولمالی­دیر. حوکمن... حوکمن... مثلن جانلی، یان-­یؤر­لی بیر قادین قارانلیق­ کوچه ­ده ایره ­لی گلیب، هئلله­نه -هئلله­نه گولسون. یوخ... او، اینجه بئل قادین­لارا وورغون ایدی. بو قادین، گئیدیک­­لرینی سویوندورماغا دَ­یمز... تیک... تاک... سانیرام بو اؤیکو، سونا چاتمایا... گئدیشی چوخ آستادیر... ایل­ بیز واری سورونور... دئیه­ سن الیم بوشا چیخاجاق... بؤیوک یازیچی، ناشیجاسینا یازماز. ایکی ثانیه سونرا، ساعات اون اللی اوچ دقیقه اولاجاق. او، ساعات اون قیرخ ­بئش دقیقه­ده، نوح طوفانی­ حاققیندا بیر اؤیکو یازمالی­دیر... قادینین سسی... ماهنی اوخویور... مطبخین مشجّر پنجره ­سی آرخاسیندا قادینین گؤوده ­سی... یوخ... اؤیکوده کوچه قاپالی­دیر، آریق قادینین ساچلاری ایسه دالغالی و ساریشین. چوخ اولسا ایگیرمی­ ایکی یاشی اولا بیلر. گؤوده­سی ­نین آناتومیسینیه چوخ یئتیشمیر. کوچه قاپالی کوچه­دیر، قادینین گؤزلری ایسه آچیق، ماوی. ائله ­کی، کیشی میخلانیر... تیک... تاک... ساعات اون اللی­ بئش دقیقه­ده، کیشی اؤز خیالیندا، قادینین بویونو سئیر ائدیر. اؤیکو قادینی، اویناشلی، عشوه ­ساتان و آلدادان­دیر. آنجاق یاشام قادینی، مطبخ قادینی، عادی قادین، همیشه الده­ دیر. مطبخ قادینی، سالاد حاضیرلاییر. زامان ساده­ جه کئچیر. زاماندان، بیر شئی آلماق اولماز... اوشاق­لارین سسی... پیشدیهلی!... آتاما دئیه ­یه ­م وویای شَنی... ادب­شیز. ایندی قویاغیوی بویای... حققیندی... ایندی کی بئله اولدو، اؤزوم گلله ­م ساچ­لاریوی یولارام خانیم. هله، قیرمیز توپودا وئرمرم بیله ­وه... یاخجی وئیمه... اؤزومونکی گؤزه ­یدی... زامان، کیچیک قیزی آغلادیر... تیک... تاک... قلمین جوهری کاغیذ اوسته یاییلیر. ماوی­گؤز قادینین سوسماسی، ال­لری کوبود کیشی ­نین بوشونا آختاریشی! آختارما. آریق قادین کوچه­ ده ایته ­­جَک. آنجاق، پارچالانمیش زنجیرینی، کؤک قادینینین بوینونا دولا. اونوتما ماوی گؤزلری. اؤیکو ایره ­لی گئتمیر آخی!... اؤیکونون آردی، انتیقام دویغوسوندان باشقا، هئچ نه دئییل. سیز، گؤزل­سینیز خانیم. اؤیکونون قورتاریشی اوچون، قارانلیق و خلوت کوچه­ ده اوچ دقیقه تیک­ تاک گرک، گؤزله ­مک گرک. تام بوشلوق. تام شهوت. اؤیکونون مایاسیزلیغی... اولسون... ساللانا- ساللانا قاباغا گئت. قادینلا کیشی آیریلیرلار، کوچه، هله­ ده قارانلیق­دیر... اوچ ثانیه سونرا، بیر معجزه باش وئره­ جک بلکه. بلکه­ ده، یازیچی ­نین دؤزومو، اونو بیر باشقا اؤیکویه ساری یوللاندیراجاق. یازیچی راضیلاشا بیلمیر. چاره ­سیز، بیر نئچه اؤزل آد آختاریر اؤیکونون قادین­لارینا. قادینین گؤزللییی، پیرتلاشیق کاغیذلارین آراسیندا چورویور. قادین یوخ اولور. بوشلوغا دوغرو یول آلیر...
اؤیکو باشلانیر. اؤیکو باشلانیب­دیر. اون­ایکی ثانیه اؤنجه. گؤزله­نیلمز بیر معجزه­دیر بو. پارام پارچا اؤیکونون اورتاسیندان، بیردن: معجزه! معجزه! معجزه! معجزه! معجزه!
ساعات تیک ووردوغوندا، گئجه اون­ بیر اولوب. اون ­اوچ دقیقه­دیر بیز جایمیشیق. اؤیکو باشلانیب ­دیر. بیز، یازیچی­نین اونودولموش اؤیکوسونو بوشونا ایزله­ میشیک. اؤیکو، بیر قایغیلی گئجه ­ده، بو جومله ­یله باشلانیب: «من، نوح طوفانی­ حاققیندا بیر اؤیکو یازماق ایسته­ییردیم، یعنی اونلار مندن ایسته ­میشدیلر... دینی بیر کیتابدا، اوشاق­لار اوچون، پولسوزلوقدان، ـ یازارام، دئدیم...»
من نوح طوفانینا عایید بیر اؤیکو یازماق ایسته­ ییردیم. آنجاق، بو اؤیکویه، هانسی بیر آد وئرمه­ ییمی بیلمه­ ییردیم. باشلانغیجی­نین، نه­ قدَ­ر چتین اولدوغونو دوشونوردوم. سیرالانمیش سؤزلر راحات قویماییردیلار منی. غورورلا باشیما جوموردولار، سونرا باغیرا -باغیرا کاغیذلار اوستونه سپیلیردیلر. اونلارین اؤنونو آلا بیلمه­ ییردیم. شخصیت لر، اؤزو اؤزونه اؤیکومه یاپیشیردیلار. حئیوان­لار، آغیر گؤوده ­لرینی قاباغا اَییردیلر، دیرناق گؤستریردیلر، جیرماقلاییردیلار، اینجیدیردیلر.
گئجه ساعات اون قیرخ ­یئددی دقیقه اولدوغونو خاطیرلاییرسینیزمی؟ من بیر اؤیکو یازماق ... . سوسمایین. من گولوردوم. بلکه­ ده، دورمادان آغلاییردیم، دانیشیردیم. داریسقال و داریخمالی اوتاغیمی آددیملاییردیم. هر شئیه فیکیرلی باخیردیم. اینجیمیش، یول­ ایتیرمیش روحوما دایاق تاپماق اوچون، ال آیاق چالیردیم.
اوشاق­لارین چیغیرتیسییلا، مطبخده قاب­قاجاغین سسینی دویوردوم. آنجاق یئنه، اؤیکو ایره­ لی گئتمه ییردی. قادینیمی اونوتماغا چالیشیردیم، آنجاق یئنه ده سسی اوجالیردی. منی سسله ­ییردی، اوشاق­لاری سوسدورماق اوچون. اوشاق­لارین الیندن جانا گلمیشدی. اونون سسی ­نین اؤزل بیر ژئستی وار ایدی. آلدادیجی سسی ­نین آرخاسیندا، نیفرت­ تؤره دن بیر دویغو دالغالانیردی. سسی روحومو چئینه ­ییردی. تیک... تاک...
گئجه، ساعات اون­ بیر اوچ دقیقه­نی گؤستریر. من کیمی سکسکه­ لی، هیجانلی، آخماق بیری­ نین گؤزلری قاپالی­دیر. یاشامدا، انسان، یولداش­لاری­نین آتماجالارینی دوشونمه­ دییی آن­لار وار. بیر آز دوشونمک­له، ابهامدان چیخا بیله ­جک یئرسیز حادثه لر. قادینیم معصومیت ماسکاسی­ نین آرخاسیندان منه گولوردو، کسین ­لیک­له. بلکه ده، منیم ساده ­لیییمه اوره ­یی یانیردی. اوتانماز! قادینیم منه خیانت ائدیر.
[تانری، انسان تؤره­تدییی یامانلیق­لاری یئر اوزونده گؤردو... تانری، انسانی یئر اوزونه گؤنده ­ردییی اوچون، پئشمان اولوب اوره ­یی کدرلندی] ... تیک... تاک...
نوح فیرتیناسی ­نین اؤیکوسو یازیلسین دئیه زامان اوره­ یینده بیر جیغیر سالین. «عهدِ عتیق» دؤرونده، زامان زامان­ سیزدیر. [تانری دئدی انسان­لاری یاراتدیغیمدان سونرا، اونلاری یئر اوزوندن گؤتوره ­جه ­یم. انسان­لاری، بؤجک­­لری، گؤیده اوچان­لاری... یاراتماق­لاریندان تأسف ­لندیییمه گؤره...] ... تیک... تاک...
اؤیکو ساعات اون­ بیر بئش دقیقه ­ده باشلانیب­دیر. زامان آخیر. زامان اوچور. اولماغیمیز، زاماندا باشلانیر. زامان دایانیر. یوخ، بیر آن، زامان خطینده، نقطه اولا بیلر. یوللانیش آردیندا.
آنجاق، آن­لارین تجروبه ­سی ساعات اون ­بیر آلتی دقیقه­ یه باغلی دئییل. انتیظار... انتیظار... مطبخ پنجره­ سی آرخاسیندا، قادینین چابالایان کؤلگه­ سی بیر گئرچک­دیر، بیر لحظه­دیر. کیملییی وار. یاشام ریتمی ­نین بیر پارچاسی ­دیر. نه ­ایسه یازیچینی یئرسیز بیر قورخو بورویوب. بیز، بیردن بیره، یازیچی­نین آنلاشیلماز سطیرلری­نین ارتیباطینی اونون بیغ­لارییلا تاپماغا ماراقلانیریق. نئچه ثانیه کئچدییینده، مطبخ قادینین گئرچک ­لییی بیزیم خیالیمیزا یوکله ­نه ­جک­دیر. ماوی­گؤز قادینین توتارلی و سئحیرلی باخیش­لاری، قارانلیق کوچه­نین سونوندا زاوال­لانیر. ائله بونا گؤره ده، یازیچی­نین گنج قادینا اورَ­ک باغلاماسی، فیکیری­نین اونا ساری یؤنلمه­سی، اؤیکونون گلیشمه ­مه سینه، گئری قالماغینا سبب اولور. بیز، آجی گولوش­لریمیزله نوح اؤیکوسونون داوام ائتمه ­­سینی دیله­ مه ­یه گره­ کلی­ ییک. آنجاق، ائله بیل او بیزیم اعتراض­لاریمیزی اؤنملی بیلمه­ییر. تیک... تاک...
قیزارمیش سوغان قوخوسو گلیر. قادین اییسی گلیر. ماوی پالتار گئییب­دیر. قاباریق دؤش­لری مشجّر پنجره­نین اوزونده یاییلیر. گؤزه ­للییی سولوخلانیر. کیشی آجیقلی­دیر. قادین چَکینیر اوندان. اَت ییغینی چَکنیر اوندان. [و یئر ایسه، تانری­نین باخیشیندا قوخویوب­دور؛ یئر کوره ­سی ظولمییله تیخانیب. تانری اؤزو گؤردو، یئر قوخویوب­دور] ... تیک... تاک...
گئجه ساعات اون­ بیر دوققوز دقیقه­. پنجره ­نین دَ­ییشمه­سینی دوشونور. اونون کیچیک آپارتمانیندا، هشتاد بئش کیلولوق قادین گؤزه چارپیر. پنجره­ نین یئرینه، دیوار چکمه ­یی دوشونور. هه. هه. هه. پیچیلداییر. او معصوم باخیش­لارین، آیدین گؤزلرین، کیمه عایید اولدوغونو بیلمک ایسته ­ییردیم. اوتاغیندا، قادینین شکلینی توز باسمیش­دیر. اون ایل یاشاییش، اون ایل. لاپ بئله زامانی اؤلدورموشم. قادینیم... آخ... لعنت اولسون بو یاشاییشا...
گؤرونمز بیر آخیم مطبخدن ائشییه سوزولور. قادین هر یانی دولانیر. بیبَر آختاریر، چؤرَک آختاریر، سو آختاریر. اَییلیر، کؤک قادین اَییلیر... گؤوده­ سی تیتره­ ییر. یانچاق­لاری تیتره ییر. یازیچی­نین باخیشی، کاغیذلارا دوغرو یؤنه ­لیر. قوخو یاییلر. قوخو یاییلر. بوندان آرتیق دایانا بیلمیر. قادینین پنجره آرخاسیندان اؤزونو گؤسترمه ­یی. ائشییه چیخیر... آددیم­لاری­نین سسی... اوشاق­لارین قیشقیریغی... من اوویوو اولمویام... سن اوغوروسان... من اوویوو اولمویام... من گه ­یینم... من قویچاغیمی ایسته­ یییم... سن پیس­سن... سن اوغوروسان... تاق... تاق... سن اؤلدون... سن بیر اؤلو اوغوروسان... من اوویوو اولمویام... تاق... تاق... قادین ایره ­لی گلیر.
گَل... ساغ بودونو... سول بودونو... آیاغینی قالدیر. ات ییغینی ایره ­لی گَل... گول. اوره کدن گول، گل... سن پیس اوغیان­سان... آآآآآنااااا... گل هَرزه... گوجلو قول­لاریم گؤزله ییر... ایچیندن گولوش­لرینی اوچورت. گیزلی­جه گولمه. گل، دایانما، گل... من سنین پایینام. قورخما گل قاباغا... تیک... تاک... ساعات اون ­بیر اون ­بیر دقیقه.
[و تانری نوحا دئدی: بوتون­ انسان­لارین سونونو اینانیرام. نییه ­کی، یئر دولوبدور اونلارین ظلم­لریندن. اونلاری یئرله بیرگه نفسدن سالماغی دوشونور­م. ایندی، اؤزونه آردیج آغاجیندان بیر گمی سال، اوتاق­لار تیک گمینده، ایچ ائشییینی قیرلا بویا...]
هاوا بولودلانیر... آنجاق فیرتینادان خبر یوخدور... بو هیجانلی اؤیکو سونا چاتماییر. اؤلوم ماهنی اوخویور. قورد اولاییر. یول گؤرسنمیر. بیر قالماقال ذهنیمیزی، خیال­لاریمیزی داغیدیر. بلکه ده، اؤلومو گؤزله­ییریک. گؤی­لردن سس گلیر. بیز ائیشتمه­ییریک. دینمَزلیک اوروجو توتموشدوق. اؤیکوده­کی انسان­لار قاچیر، قیشقیریر، آنجاق بیز اوخوجولار سیقار چکیریک. بیری آغلاییر، بیری باشینا دؤیور. یازیچی­نین سؤزجوک­لری آیاق­لار آلتیندا اَزیلیر. فیرتینا گلیر. کاغیذلار اویناییر کولکده.
[و یئددی گون سونرا، فیرتینانین سویو، یئره گلدی... بوتون بولاق­لار جوشدو، گؤیون باجالاری آچیلدی، یاغیش، قیرخ گوندوز، قیرخ گئجه یئره گلدی...] تیک... تاک...
آتاااااا... آتا. آنااااااااا... آتا وویما... آتا، آنانی وویما... جیندا... آتا... گئدین اوتاغیزا... کیشی ­نین گوجلو قولو... قیشقیریق... شاپالاق... قیشقیریق... قادینین قاچماسی... قیشقیریق... تپیک... قیشقیریق... قادینین باشی­نین دیوارا دَیمه­سی... آتااااااا... قیشقیریق... آناااااا... قیشقیریق... قاییش... قیشقیریق... قادینین دَریسی... قیشقیریق... یارا... قیشقیریق... آلنین چاتلاماسی... قیشقیریق... اوشاق­لارین یوموروق­لاری، باغلی قاپی ­یا دؤیولمه­سی... قیشقیریق... قیشقیریق... قیشقیریق...
توستو حلقه­لری ­نین اورتاسیندا، ساعات اون بیر قیرخ دقیقه­ یله قادینین گؤز یاش­لاری آراسیندا اؤزل بیر ایلگی­ یوخدور. هله ده، درد قالیب­دیر. اوره ­یی قالخیر. اوره­ یی دؤیونور. اللریندن، آلنیندان قان دامیر خالچا اوستونه. قان فیرتیناسی. پالتاری قانلی­دیر. یئره سریلمیش، قانلی. هئچ آخماق یازیچی، ادبی یارادیجیلیغیندا، ائوین فضاسینی آلوولاندیرماز. آنجاق اؤیکوسوندن الکل قوخوسو گلیر، الکل. نئچه واخت­دیر، هر گئجه کئفله­نیرسه ده، قورخوسو آزالماییر آنجاق.
گئجه ساعات اون ­بیر قیرخ­ اوچ دقیقه ­دیر. قادین اوشویور. اوشاق­لارین اوتاغینا ساری باخیر. شام یئمه­دن یاتیب­لار. باشقا بیر فیرتینا یولدادیرمی؟! کیشی ترپنمه­ییر. کیشی ­نین بلکه اوره­ یی یانسین دئیه، قادین الی بئلینه آپاراراق، آیاغا قالخیر. کیشی سوسوب. زامان کئچیر. تیک... تاک... هر شئیین گؤز اؤنوندن کئچمه ­سی... تانیشلیقدان ایندی­یه قدَ­ر. قادین پیچیلداییر. سؤزلر ایتیر، سینیق دیش­لری­ آراسیندا، سینه ­سی ­نین خیس­ خیسیندا. هده ­له ­مه. هده ­له ­مه. قادین ترپنمه ­ییر. کیشی­نین آددیم­لاری آغیرلاشیب­دیر. قادینین سیزیلداماسی، بلکه­ ده قارغیشی. کیشی سوروشور: اوشاق­لار یاتیب؟ جاوابینی گؤزله ­ییر. کئچن آن­لارین کله­ کؤتورلویوندن خبرسیز... آخ...
بو، ساعات اون ­بیر قیرخ ­بئش دقیقه­نین، قادینین سسی­ دیر. زامان هر شئیی هؤولاییر، ساعات اون­بیر اوتوز دقیقه­نین فیرتیناسینی ایسه ابتذالا چکیر. اون ­بیر ایگیرمی ­سککیز دقیقه ­نین قادینی ایتیر. اون­بیر قیرخ­آلتی دقیقه ­نین کیشی ­سی، سینیق پنجره ­لره باخیر. اؤزونو یامانلاییر. قیشقیریر. قول­لارینی ترپه ­دیر. باشینی بوللاییر. زامان آستاجا گئدیر. قادینین خیانت ائتمه ­سیندن قیشقیریر.
یالان! یالان! یالان! کیشی باهانا آختاریر. کیشی ­نین ایچیندن، بیر آلوو، یول آختاریردی قادینی یاندیرماق اوچون. قادین قیزیشما ایچینده یانیر. ساعات اون­ بیر قیرخ­ یئددی دقیقه­ده.
بو دوروملا نئجه باش باشا وئره­ جک­دیر. بیر آن یئتر، قارانلیق کوچه­ده قادینی تومارلاماغا، دادماغا... بلکه قادین، بو قارانلیق کوچه ­یه، یانلیش گیریب­دیر. سونرا حیاتی ­نین بؤیوک یانلیشی باش وئریب­دیر.
گئجه ساعات اون­بیر قیرخ­سککیز دقیقه­ده، قادین، فیرتینانین قورتارمایاجاغینی دویور. تیک... تاک... میزین سییرمه ­سینده، گیزلتدییی بیر شئی­لره فیکیرلشیر قادین. دیازپام... کندیر...
انسان بو آن­لاردا سیناندیر. کیشی­نین چیلغینجاسینا قهقهه ­لری. اؤلوم دلی­جه­ سینه اونلارا ساری گلیر.
[و سو، یئر اوزونده داغ­لارا قد­ر اوجالدی... قورولوقدا اولان بوتون انسان­لارلا حئیوان­لار اؤلدولر... یالنیز، نوح­ـلا گمی­سینده اولان­لار دیری قالدی...] تیک... تاک...
ساعات اون بیر اللی دقیقه. اؤلوم قادینا یاخینلاشیر. کیشی قادینا یاخینلاشیر. قادینین گؤوده ­سینه ساری اَییلیر. قادین سوسوب. کیشی دیوارین اؤنونده اوتوروب، اؤزونه جومور. ال­لرینی اوشاق­لار سایاغی اوزونه قویور. اوتاغین ایشیغی آزالیر. قادین سوسوب. کیشی آغلاییر. تیک... تاک... تیک... تاک... کیشی­نین هؤنکورتوسو اوجالیر.