کارواش
ائلدار خیاوی

.
"ایستی دی بورا"
دوروب باشقا بیر صندلده اوتوردو و دووارداکی رسیملره باخدی نازلی.بیریسی چیمنلیکده پارک اولونموش، پاریلدایان بیر ماشین ایدی.
" یوز ایل بوندان قاباق بو ماشینین یئرینه آت یا قاطیرباغلانارمیش"
و بو فیکیردن سونرا قارنیندا، آغیربیر تورش شئی توولاندی.
"یؤز ایل بوندان سونرا من ده اولمایاجاغام"
گله جه یی و گله جکده باش وئره جکلری گؤره بیلمه یه جه یینه گؤره، او چاغین آداملارینا قیسقاناردی هر زامان.گولونج بیر فیکیر بئینینه ساچدیغینا گؤره دوداغی قاچدی:" ماشینی اوتلاماغا چیمنلییه بوراخیبلار". ماشینین نئجه اوتارماغی،آغناماغی و گؤووشه مه یینه(1) فیکیرلشدیکده، اوره یینده سرین بیر مئهین اسمه یینی دویدو.
ساغ قیچینی سول قیچینین اوستونه آشيردی و او حالدا بودونون دریسینین چکیلمه سینی حیس ائتدی.
" خاملامیشام".
دونن بایرامین اون اوچونجو گونویدو و چؤله چیخدیقلاریندا چوخلو آتیلیب دوشموشدو ، بو گون یوخودان آییلاندان بری،ووجودوندا درین یورقونلوق حیس ائدیردی.
اورا بویوک بیر کارواش ایدی. تبریزین ان بویوک کارواشی. ایشچی لرینین سایی سی چوخ اولدوغونا گؤره، ماشین لارین یووولماسی چوخ آز سوره ردی، بوندان اؤترو موشتری سی چوخ اولاردی. کارواشین حَیَط ینین بیر بوجاغیندا، بالاجا بیر اوتاق تیکیلمیشدی، موشتریلرین راحاتجاسینا اوتوروب ماشین لارینین یویولماسینی گؤزلمه لری اوچون. بیر نئچه صندل، بیر بخاری و دووارلاردان آسیلمیش بیر _ ایکی رسیم له دولدورموشدولار اوتاغی.
نازلی دوردو اوتاغین بؤیوک پنجره سین نن ایشچی لره و اونلارین ایشله مه یینه باخدی. اؤزونو اونلارین بیری سینین یئرینه قویدو.
" ماشینین قاباق شوشه سینی یوماغین آیری کئفی وار".
ماشینی یووان آریق ایشچی، قاباق شوشه نی الینده کی دسمال نان کؤپوک لتدی، سونرا کاپوتو، چاتینی و قاپی لاری دا. ماشین ، کؤپویه بوروندو.
"گؤر نه کئف چکیر. آدام گیره حاماما، بیری ده آدامی یویوندورا"
ماشینی اوجادان کیشنه دی و تشککورله دولو اولان گؤزلریله اونو قشوولایان ایشچی یه باخدی.
"ایندی سیرا، کؤپوک لری یوماق دادی "
آریق ایشچی، اوزون بیر فیشقیردیجی شیلانقی الینه آلیب ، ماشینی دیققتله یوماغا باشلادی. سویون اینجه - اینجه دامجی لاری ماشینین اوزونه دَیدیکجه یئنی دن گؤیه سیچراشیب و گؤی قورشاغینا بنزر بیر شئی ماشین لا ایشچی نین آراسیندا یارانیردی.
"به به".
بویوک کارواش ایکی یئره بؤلونموشدو. بیر طرفده ماشین لاری یویوردولار، اوبیری طرفده قورودوردولار. نازلی ماشینینی ساخلایییب آریق ایشچی یه بیر 500 تومن لیک وئریب"آچاری قویدوم اوستونه، قورودان نان سورا منی چاغیر"دئمیشدی." گؤزوم اوسته" دییه رک،آریق ایشچینین باخیشی قیزین بوینونون آغ دریسینه سوروندورولموشدو.
"گؤزووه تیکان باتسین، گؤزووه تیکان باتسین، گؤزووه تیکان باتسین"
اوره یی بولانارکن،نازلی چؤنوب قارا شوشه لی اوتاغا ساری گئتمیشدی و آریق ایشچی نین باخیشینی باشیندان آیاغینا جان سورونولمه سینی ایرگه نه - ایرگه نه حیس ائتمیشدی.
"بی شرف کؤپئی اوغلو"
جاوان بیر اوغلان گونون آلتیندا دوروب، آراباسینین قورودولماسینی گودوردو.
" ایشیم قوتارانا جان بیری گلمه سه بورا یاخچی اولار"
صندلین اوزه رینده ادبلی قیزلار تکین اوتوروب، کیشی لرین گؤزآلتی باخیش لارینی سایماماغا حوصله سی قالمامیشدی.
آغ بیر ماشین کارواشا گیردی. او قدرده باتیق _ بولاشیق دَییلدی نازلی جا. ماشین ، یویولما بؤلومونده ساخلانیلدی و سوروجوسو ائنیب ایشچی لرین بیریسیله دانیشاراق ماشینین اوزه رینده بیر _ ایکی یئری گؤرستدی. سونرا ایسلانماسین دییه کارواشین حَیط ینه دوغرو یئریدی. بو جاوان اوغلانی نازلی دؤرد یاشیندان تانیردی.
بیرلیکده اوشاق لار باخچاسینا گئده ردیلر. او زامان پوتا بیراوغلانجیق اولاراق، یاشیدلارینی دؤیوب اونلارا زور دییه ردی. اؤزونه دسته قوشون قوروب شاهلیق ائله ردی. اونون قوشونونون بؤیوک تفرئحی، قیز لاری قورخوتماق و اؤیرتمن لرین گؤزوندن ایراق، اونلاری دؤیمک ایدی.
نازلی او اوغلانی تای توشلارینین یانیندا دؤیدویونو هئچ زامان اونوتمازدی. اوشاق لیغی نین ان شیرین خاطیره لریندن بیری ایدی، ان پارلاق خاطیره سی.
دفعه لرجه دیسکیندیریلمک و دؤیولمه یین عوضینی بیر یوموروقدا چیخمیشدی. اؤزوده قارنیندان. فقط بیر یوموروق. اوغلانجیق یئره ییخیلیب آغلایا - آغلایا قیوریلمیشدی. اوشاقلار اؤیرتمنی چاغیرماغا قاچمیشدیلار.
بو دوروملا بیلدیر ده اوزلشمیشدی. بایرامین اون دؤردونجو گونو، باشقا کارواشدا همن اوغلانی گؤرموشدو. اونو گؤرمک او قدر ده گؤزله نیلمز شئی دَییلدی. بیلی یوردوندا(2) یا آبرسان دا یا ولی عصرین(3) شانزه لیزه سینده اوز اوزه گلردیلر گاهدان. اما هئچ زامان بیر بیرینی تانیدیقلارینی اوزله رینه گتیرمزدیلر.
یادینا گلدییی قدر بیلدیر ده ائله بو ساعاتلاردا، دؤرد دؤرد یاریم میزانین دا، کارواشا گلمیشدی.
"آیدین... آیدین نم نمنه".
آیدین قوروتما بؤلومونده دوران جاوان اوغلانا ساری گئدیب اونو چاغیردی. ایکی جاوان بیر بیرینی قوجاقلاییب اؤپوشدولر.
"تانیش چیخدیلار"
اؤز ماشینینا باخدی. آریق ایشچی ماشینا میندی و اونو قوروتما بؤلومونه ساری سوردو. آچارینی اونا وئردییی اوچون اؤزون نن حیرصلی ایدی.
" حارامون اولسون او 500"

کارواشا ایکی عسگر گیردیلر و کارواشین مودورلویونه( بالاجا بیر اوتاق، تام حَیطین اورتاسیندا) ساری دوغرولدولار. بیریسینین الینده بیر پیتیک واریدی، ایکیسی ده فانوسقالارینا قولباغی تاخمیشدیلار. پاریلدایان قولباغی لار.
بیر آن غریبه بیرحیس نازلی نی بورودو. آیاقلارینین یئردن قوپدوغونو ،هاوا دا آسلاق قالدیغینی ساندی. اؤلدویونو حیس ائتدی. بؤیوک جامین دالیندان دیریلرین بوش - بوش چالیشمالارینی ایزله ییردی سانکی.
" آآآ... اؤلوم بئله بیر شئی اولمالی ها: بؤیوک بیر شوشه قاپی، قارامتیل بیر شوشه. قاپی نین بوتاییندان اوتایی گؤرسه نیر آما ترس طرفدن ساده جه قارا بیر آغیز گؤرونور."
اؤزونو بیر صندلین اوستونه ییخیب قاپینی آچابیلیب درین نفس آلابیلدییینی آرزولادی.
" اؤلورم. آیدین گلیب قاپی نی آچسایدی بیر آز تزه هاوا گیره ردی بورا".
ماشینینا باخدی. آریق ایشچی الکتریک سوپورگه ایله ماشینین ایچینی سوپوروردو. مودورنن بیرلیکده، عسگرلر آریق ایشچی یه دوغرو گئدیردیلر.
" نه خبر دی؟ نه اولوب؟"
آیدین لا جاوان اوغلان دانیشا - دانیشا قارا شوشه قاپی یا ساری گلیردیلر و ایچری گیرمه دن قاپی نین آغزیندا دوردولار .
"گرک گئدم آچاریمی گئری آلام"
آیدین قاپی نی آچدیقدا نازلی نی گؤره رک اؤزونو گؤرمه مزلییه ووردو.
" ااااه ایندی گؤزومون قاباغین نان چکیلسه لر"
عسگرلرین هارا گئتدیکلرینی گؤرمه یه تله سیردی. جاوانلار بوش صندل لره دوغرو گئتدیلر و نازلی ماشینینی آختاردیقدا آریق ایشچی نی رولین آرخاسیندا گؤردو. عسگر لر ماشینین آردینجا قاچیردیلار و اوجادان "دور، دور " دئییردیلر.
" ائله بیل بوصحنه نی نئچه یول یوخودا گؤرموشم".

.
_________________

.
(1) گؤوشه مک: حیوانلارین، یئدیکلری اوتلاری آغیزلاریندا چئینه مه سینه وئریلن آد.
(2) بیلی یوردو: دانشگاه
(3) آبرسان و ولیعصر تبریزین محلله آدلاریدیلار.