جناب نوبئل باریش موکافاتی!
بوگون ناهارا غزه ­نین جنازه ­لرینی سئیر ائده-ائده باسدیرما پیلوو یئدیک
بیر گؤزوموز تئلویزیونا باخدی
بیر گؤزوموز قاشیغیمیزین اَتینی عیارلادی
سونرا مدنی فیقورایلا باشیمیزی توولادیق انسانجاسینا
بومبالارین ویییلتیسی و تانکالارین ویژیلتی­یلا قیژیلداماسی
عصبلریمیزی قاتمادی بیلمیرم ندن
21 غزه ­لی اوشاغین اؤلدویونو دویدوق و چوخلو قادین
بونونلا الیمیزی یئمکدن چکمه ­دیک
کوکاکولامیزدان واز گئچمه ­دیک
و کاهی سالادیمیزا عینادکار ناریشلار سیخدیق
چوخ یئمه­ لی اولدو زیتون یاغیلا جناب باریش!
بئله دوشوندوک کی، زیتونون یارپاقلاری
گؤیلرده گیجه ­لن گؤیرچینین بوغازینا ایلیشیب بلکی
آمما چَچیمه ­دیک ... اودغونمادیق... اوره ­ییمیز بولانمادی هئچ جنازه ­لردن
و دانیشیقلاریمیزی LGیوخسا Samsung تئلویزیونلاری اوزرینده داوام ائتدیردیک
بونلارین هامیسی نه دئمکدیر جناب نوبئل باریش موکافاتی؟
سیز نه یئدینیز ناهارا عالیجناب؟

جناب موکافات ... جناب نوبئل ... جناب باریش!
نوه ­مین آدینی «کاتیوشا» قویماغا سیزه سؤز وئریرم
بومبالارینیزا بویورون بؤیله آمانسیز اَلنمه ­سین
غزه اوشاقلارینین یومشاجیق دارانمیش ساچلارینا
و مصلحت بیلسه ­نیز بویورون
بیرآز یئر آچسینلار غزه­ کوچه ­لرینین گؤیلرینده
یانوار قارلارینین شیلتاقجا اویناقلاماسینا
.

.
2009/1/3
87/10/14
تبریز