لاله لاله لاله
زیبا کرباسی

لاله لاله لاله ... او قیز
او جیرتدان ګؤز ژاپنلی قیز
ساری سایه لری یاخیلمیشی دیییرم.... ائوی ییخیلمیشی
حجمی آلومینوم موزه نین اته یینده
عکسیمیزی سالا سالا اته ییمی ییغیشدیریردیم
ګون بئینیمه ووردی..... بئینیم ګونور..... ایندی ګولور یعنی
یعنی ګولور

ای وای بوراسی قولمه لی اولدو..... فارس قاتدیم ائله بیل
شلواریم تنق اولدی
زنجفیل لازیمدی..... وار اولسون ګولماخ سسیمیز

لاله لاله لاله ...های کوی سالمامین تتینمه سین چکیرم
هاوانین تورلارین تانییب نفسیم... چالیر
قوشلارین هاواسیندا قول قاناد چابالیرام
بیر دیققیلی ګمی کیمی بوتون دریانین سویون ایچیب جومورام
آآآآآآی بو قیرمیزی قورخودور منی یوخودا
یوخوما ال چاتمیرام
اؤزومدن اوزاخلاشیرام
من او یوخوسوز یئتیمم لاله
سبزی هئش سؤیمورم..... آغی سؤیورم.... سارینی هردم.... ماهوتینی چوخ
اصلا هئش بیرین
هیپوهکی چالیر قولاغیمدا نینیخدان دومبک کیمی بیر ساز
ګل منی آپاراخ یاتیرداخ آی قیز
موغانلی لارین دخالتی وار قانیمدا بوګونلر
قاندیریر منی او سؤزلر
آی لاله... دومویون ایتیرمیش اوشاخ کیمی ناققا بارماغیمدان ال چکنمیرم
الیم ال اته ییمه دولاشیر آغاجلارا زپدن.
آی... آی... آی.... دئنن آخشاملار آیا باخاندا آچسین قوینونو قانلی موغانیم
دئنن سحردی... یوخوم ګلیر.... اسنیرم
سیزین موغاندا سئویشماخ اولار؟
او اوغلانی ګؤرمه سم فیججه له رم.