بوراسی دؤیوش مئیدانی دیر . دیشلرینیزی قیسین قاسیرغالار قوپسون قوپوزلانمیش قیچلارینیزدان. قایچیلاندیقجا چوخالماغینیزین فلسفه­سینی آنلادین آنلامازلارا. بوراسی آنلامسیز آنی­لارین غلبه­سیدیر. غلبه­نیزدن قانیم قاینایارکن اینامسیز گؤزلریمه قیپ – قیرمیزی ایناملار دولور.

داها دونیا تورک اولدوغونو دانمایاجاق. سن ایندی سیلاحسیز دؤیوشورسن. هئچ بیر بایراغی مغلوب ائتمه­دن، هئچ بیر اینسانین قانینی تؤکمه­دن اونودولموش آدینی قایتارماق ایسته­ییرسن اؤزونه. اؤزوندن اؤزونو سیلکه­له­ییب،11 اورک دؤیونتوسو ایله تؤکولورسن بو یاشیل مئیدانا.

ایندی نه آتین وار چاپماغا نه ده چاپیلمیش آدین. آدینی دونیایا ثبوت ائتمک اوچون دؤیوشورسن. بو غلبه سنین­دیر. آدینی دانماق ایسته­ینلرین داها سنی دانماغا هئچ بیر بهانه­سی قالمایاجاق.

اوجال…! ای قانیمدا قاینایان قینیندا قالان تورکلویوم…! تیکه – تیکه تیکه­لنسن ده تؤکولورسن دامارلاریما. دامیرسان اوره­ییمه آخیرسان گؤزلریمه. قوی منی قانداللاییب یئنه دانسینلار سنین آدینی چکدییم اوچون. لاپ ایسته­سه­لر قانیمی دامارلاریمدان آخیدیب آخدیرسینلار. یئنه قان گله­جک دامارلاریما. یئنه قاینایاجاق.